नेपथ्यले सुनायो म्यानहटनलाई नेपाल

160

विश्वकै केन्द्र मानिने न्यूयोर्क । त्यसको पनि अग्ला घरहरूले तँछाड मछाड गर्ने म्यानहटन । आकाश छेडेका विशाल संरचनाहरूले तलका चौंडा सडकलाई पनि दिउँसै अँध्यारो गल्ली तुल्याइदिन्छ । अनि असाध्यै ब्यस्त यो सहरको छायाँमा संसारै अटाएर पनि सबैथोक हराइरहेको हुन्छ ।
गत शनिबार दुई घण्टासम्म एक ठाउँमा नेपाली आवाजमा रमाए । यसरी रमाउनेमध्येकै थिए प्रबल गुरुङ । न्यूयोर्कमा बसेर विश्वकै नामी फेसन डिजाइनरहरूसँग प्रतिस्पर्धा गरिरहेका यी नेपाली युवक हलभित्र कतिसम्म गदगद थिए भन्ने कुराको अनुमान एकपछि अर्को उनका ट्वीटर पोष्टबाटै लगाउन सकिन्थ्यो ।
‘शनिबारको साँझ नेपथ्यसँग जादूमयी बनेको छ,’ अर्को पोष्टमा उनी फेरि भन्थे, ‘नेपथ्यजस्तो आफ्नै घरमा हुर्केका प्रतिभालाई म्यानहटनस्थित टनाटन भरिएको हलमा सुन्नु भनेको गर्व, प्रेरणादायी र सुखद तीनै कुराको समिश्रण प्राप्त गर्नु हो ।’ उनी घरि घरि दंग परेर ट्वीटको अन्त्यमा ‘जय नेपाल’ पनि लेखिरहेका हुन्थे ।
साढे तीन हजार क्षमताको त्यो अटेसमटेस हलमा प्रबलमात्र थिएनन् । नेपथ्यका प्रत्येक गीतमा रमाउनेहरू फरक–फरक पुस्ताका थिए । जसलाई उनीहरूले सुन्दै आएको आवाजमार्फत् छाडेर आएको स्वदेशसँग जोड्ने काम पनि भइरहेको थियो ।
नेपथ्यका अगुवा एवं गायक अमृत गुरुङ भनिरहेका थिए, ‘त्यतिबेला हामीले ओत पाएका थुप्रै घरहरू अस्तिको भुइँचालोपछि बचेका छैनन् । त्यस्ता गाउँहरूलाई फेरि जीवित पार्नका निम्ति हामी सबै ती स्थानहरूमा घुम्न जाऔं ।’ उनले अमेरिकामा बसोबास गरिरहेका तमाम नेपालीसँग नेपालको पुनः निर्माणका निम्ति यसरी आव्हान गरे ।
सन् २०१५ मा ब्याण्ड विभिन्न मुलुकको साँगीतिक भ्रमणका कारण ब्यस्त बन्न पुग्यो । न्यूयोर्क आउनुअगावै अष्ट्रेलिया, टोकियो, दुबई र लण्डनजस्ता स्थानहरूमा भब्य प्रदर्शन सम्पन्न भइसकेका छन् । ‘अमेरिकामा प्रस्तुतीको निम्ति निकै प्रयासहरू हुँदैआएका थिए,’ नेपथ्यको व्यवस्थापन गर्दै आएको नेपालयका किरणकृष्ण श्रेष्ठ भन्छन् ‘यसपटक जुरेको भ्रमण र न्यूयोर्कको सफल प्रस्तुतीले थप उर्जा दिएको छ ।’
‘म जहाँ जहाँ गएँ त्यता त्यता नेपालीहरू विभाजित हुदै गएको देख्नु परिरहेको छ,’ अमृत भन्छन् ‘त्यसैले यसपाला अमेरिकाको प्रदर्शनलाई ‘म्यूजिक फर युनिटी’ (एकताको निम्ति संगीत) नाम दिएका छौं ।’
कार्यक्रममा अमृतले विश्वभर रहेका नेपालीले एक भएर आफू र आफ्नो मुलुकको प्रतिष्ठा बढाइदिन अनुरोध पनि गरे । ‘गायक अमृतको गीतसँगै आएका आव्हान शक्तिशाली छ,’ न्यूयोर्ककै रेडियोकर्मी सहदेव पौडेल भन्छन् ‘हामीलाई एक भएर अघि बढ्न नेपथ्यका गीत मात्रै पनि पर्याप्त थियो ।’

LEAVE A REPLY

Please enter your comment!
Please enter your name here