नेपाल र भारत बीच शान्ति तथा मैत्री सन्धि भएको ६९ औं वर्ष प्रवेशका अवसरमा ग्रेटर नेपाल राष्ट्रवादी मोर्चाले आज अपरान्ह ४ः३० बजे माइतीघर मण्डलामा ग्रेटर नेपालको नक्सा अंकित ब्यानर प्रदर्शन गरेको छ ।
नेपाल र भारत बीच सन् १९५० जुलाई ३१ तारिखका दिन शान्ति तथा मैत्री सन्धि भएको थियो । उक्त सन्धिको घारा ८ ले नेपाल र बेलायत बीच भएको सुगौली सन्धि रद्द गरेको र धारा १ ले टिस्टादेखि सतलजसम्म नेपालको क्षेत्रीय अखण्डता कायम गरेको तर नेपाल र भारतले सन्धिको कार्यान्वयन नगरेका हुँदा उक्त सन्धिको धारा १ र ८ को अक्षरशः कार्यान्वयनको माग गर्दै ग्रेटर नेपाल राष्ट्रवादी मोर्चाले आजको दिन पारेर ग्रेटर नेपालको नक्सा प्रदर्शन गरेको हो ।
उक्त कार्यक्रममा बोल्दै मोर्चाका अध्यक्ष फणीन्द्र नेपालले नेपाल र भारत दुबैले उक्त सन्धिको धारा १ र ८ को कार्यान्वयन तत्काल गर्नुपर्ने माग गरे । उनले ‘नेपाल–भारत प्रबुद्ध समूहले यदि धारा ८ को प्रावधान हटाएको पाइए त्यसले ग्रेटर नेपाल प्राप्तिका लागि हतियार उठाउने बाटो खोल्नेछ’ भनी नेपाल र भारत दुबै देशका सरकारलाई चेतावनी दिए । कार्यक्रमलाई पत्रकार निमकान्त पाण्डेले पनि सम्बोधन गरेका थिए ।
