काठमाडौं/ अख्तियार दुरुपयोग अनुसन्धान आयोगको प्रमुख आयुक्तमा नवीनकुमार घिमिरेको नाम सिफारिस भएको छ ।
बुधबार बसेको संवैधानिक परिषद् बैठकले घिमिरेलाई अख्तियारको प्रमुख आयुक्त सिफारिस गरेको संवैधानिक परिषद् सचिवालय स्रोतले जानकारी दिएको छ ।
गत माघ मसान्तमा तत्कालीन प्रमुख आयुक्त दीप बस्न्यात सेवानिवृत्त भएयता अख्तियार नेतृत्वविहीन भएकोमा बैठकले प्रमुख आयुक्तको रुपमा सिफारिस गरेको हो । घिमिरे गत फागुनदेखि आयोगको कार्यबाहक प्रमुख थिए।
नेपालको संविधानको धारा २३८ मा अख्तियार दुरुपयोग अनुसन्धान आयोगमा प्रमुख आयुक्त र अन्य चार जना आयुक्तहरू रहने व्यवस्था छ। प्रमुख आयुक्तले अख्तियार दुरुपयोग अनुसन्धान आयोगको अध्यक्ष भई काम गर्ने संवैधानिक व्यवस्था छ।
राष्ट्रपतिले संवैधानिक परिषद्को सिफारिसमा प्रमुख आयुक्त र आयुक्तको नियुक्ति गर्ने र उनीहरूको पदावधि नियुक्तिको मितिले ६ वर्षको हुने व्यवस्था छ।
