काठमाडौं/ गृहमन्त्री रामबहादुर थापा ‘बादल’ले सुन तस्करीको ठूलो सञ्जाल ध्वस्त बनाउन आफू सफल भएको दावी गरेका छन् । चितवनमा पुगेर थापाले यस्तो दावी गरेका हुन् । ३३ किलो सुन तस्करी प्रकरणको अनुसन्धान गर्ने क्रममा आफू गृह मन्त्रालयको जिम्मेवारीमा पुग्नुअघिसम्म चार हजार किलो सुन तस्करी भएको रहस्योद्घाटन पनि थापाले गरे । अब सुन तस्करीको सञ्जाल तोडिएको दावी गृहमन्त्री थापाले गरिरहँदा सोही दिन बालाजुबाट ५ किलो सुन तस्करी भइरहेको अवस्थामा फेला परेको छ ।
गृहमन्त्री थापाले घरेलु हिंसा अन्त्यका लागि सरकार र जनताको संयुक्त पहलमा नयाँ अभियान सुरु गर्ने पनि जानकारी गराएका छन् । प्रेस सेन्टर र प्रेस चौतारी चितवन शाखाले आयोजना गरेको पत्रकार सम्मेलनमा उनले अपराध नियन्त्रणका लागि जनस्तरबाट अभियान सुरु गर्ने प्रतिबद्धता व्यक्त गरे । देशभरमा ३६ हजारभन्दा बढी विद्यालय र सात हजारभन्दा बढी वडा कार्यालय रहेको भन्दै मन्त्री थापाले विद्यालय र वडा कार्यालयको माध्यमबाट लाखौँ युवा परिचालन गरेर घरेलु हिंसा नियन्त्रण अभियान सञ्चालन गरिने जनाए ।
घरेलु हिंसाको मुख्य कारण मदिरा र लागुऔषध रहेको भन्दै उनले मदिराको नियमन, अनुगमन र नियन्त्रण गर्नुका साथै लागुऔषध उन्मूलन गर्नुपर्नेमा जोड दिएका छन् । गृहमन्त्री थापाले निर्मला पन्त हत्या प्रकरणमा छानबिन टोलीले बुझाएको प्रतिवेदनको निष्र्कषको आधारमा दोषीलाई कारवाही प्रक्रिया अघि बढाउने र अनुसन्धानलाई जारी राख्ने जनाएका छन् । यसअघि निर्मला पन्तजस्ता धेरै नारी बलात्कृत हुँदै आएको र ९५ प्रतिशत अपराधीलाई पक्राउ गर्न प्रहरी सफल भएको पनि उनले जनाए ।
