काठमाडौं / नेपाली माध्यममा प्रश्न नहुँदा विद्यार्थीहरूले उत्तर लेख्न नसकेको गुनासो ‘हेलो सरकार’मा परेको छ । यो गुनासो संगै त्रिभुवन विश्वविद्यालयमा स्नातक र स्नातकोत्तर तहमा अंग्रेजीसँगै नेपाली माध्यममा पनि प्रश्न सोध्न दबाब बढेको छ ।
आर्थिक वर्ष ०७५/०७६ को पहिलो तीन महिनामा त्रिविमा आएका अधिकांश गुनासा परीक्षासँग सम्बन्धित छन् । ‘हेलो सरकार’का गुनासो परीक्षा नियन्त्रण कार्यालयमा पढाएर सम्बोधन भए पनि भने विद्यार्थीको गुनासा भने सम्बोधन भएका छैनन् ।
‘त्रिविअन्तर्गतका स्नातक र स्नातकोत्तर तहमा नेपाली माध्यममा उत्तर लेख्न पाइने भन्ने निर्णय स्वागतयोग्य छ । तथापि, उत्तर नै लेख्न पाउने भएपछि प्रश्नपत्र पनि अंग्रेजी र नेपाली दुवै माध्यममा हुनुपर्ने होइन र ?,’ डिल्ली कट्टेलले ट्विटरमार्फत ३१ साउनमा गुनासो लेखेका छन्, ‘मेरो प्राध्यापनको अनुभवबाट पनि यो टड्कारो समस्या हो, किनकि प्रश्न नबुझेकै कारण उत्तर लेख्न नसकेको प्रस्ट अनुभव परीक्षा हलमा निरीक्षक बस्दा पनि हुन्छ । यसतर्फ सम्बन्धित पक्षको ध्यान जान जरुरी छ ।’
परीक्षासम्बन्धी यस्ता गुनासा
‘हेलो सरकार’मा परीक्षासम्बन्धी धेरै गुनासा परेका छन् । कतिपयले त्रिवि पनिकाले गरेको गल्तीका कारण विद्यार्थीहरूले जरिवाना तिर्नुपरेकोसमेत गुनासो गरेका छन् । कतिपयले परीक्षा दिएको विषयमा अनुपस्थित आएको उल्लेख गरेका छन् । त्यसैगरी, समयमै ट्रान्सक्रिप्ट नपाएको र समयमै नतिजा नआएका गुनासासमेत परेका छन् ।
त्रिविका नोदनाथ त्रितालका अनुसार तीन महिनामा परीक्षा र भाषा माध्यममा धेरै गुनासो आएको जनाए । अधिकांशले ‘त्रिविको स्नातक र स्नातकोत्तर तहको परीक्षामा नेपाली र अंग्रेजी माध्यमबाट लेख पनि पाउने, तर प्रश्नचाहिँ किन अंग्रेजीमा मात्र ?’ भन्ने प्रश्न गरेका छन् । रोहित नाम गरेकाले ट्विटरमै ८ साउनमा गुनासो लेखेका छन्, ‘त्रिविमा स्नातक तहमा प्रश्नपत्र अंग्रेजीमा मात्र सोध्नुपर्ने कारण भए जानकारी पाऊँ । होइन भने नेपालीमा समेत प्रश्न सोध्ने व्यवस्था गरियोस् ।’
अंग्रेजीमा प्रश्न सोधेर मात्र गुणस्तर बढ्दैन : शिक्षाध्यक्ष त्रिपाठी
त्रिवि शिक्षाध्यक्ष प्रा.डा. सुधा त्रिपाठीले अंग्रेजीसँगै नेपाली माध्यममा पनि प्रश्न सोध्नुपर्ने धेरै गुनासा आएको बताइन् । अंग्रेजीसँगै नेपाली माध्यममा पनि प्रश्न सोध्ने व्यवस्थाका लागि आफूले पहल गरेको उनको भनाइ छ । ‘अंग्रेजीमा सोधेर मात्र गुणस्तर बढ्ने होइन, दुवै माध्यममा प्रश्न सोध्नुपर्छ, सामुदायिकमा पढेर आएकाहरूले प्रश्न नबुझेर उत्तर लेख्न नसकेको पाइएको छ,’ उनले भनिन् ।
नेपालमा नेपाली माध्यममा प्रश्न सोध्न र उत्तर लेख्न नपाउने व्यवस्थाले हित नगर्ने उनले जनाइन् । ‘मैले काठमाडौंका नौवटा परीक्षा केन्द्र हेरेपछि पनिकालाई अंग्रेजीसँगै नेपालीमा पनि प्रश्न सोध्न सिफारिस गरेँ, तर अहिलेसम्म कार्यान्वयनमा आएको छैन,’ त्रिपाठीले भनिन् । उनले विभिन्न अध्ययन संस्थान र संकायहरूका डिनहरूलाई पनि नेपाली माध्यममा समेत प्रश्न सोध्ने व्यवस्था गर्न आग्रह गरेको जनाइन् ।
