हेटौंडा– प्रदेश ३ को मुख्य न्यायाधिवक्तामा ओमप्रसाद थपलिया को नाम सिफारिस भएको छ ।
मुख्यमन्त्री डोरमणि पौडेलले काठमाडौँ महानगरपालिका–१४ कलंकीका थपलियालाई बुधबार सो पदमा नियुक्तिका लागि सिफारिस गरेका हुन् ।
यसअघि मुख्य न्यायाधिवक्ताको जिम्मेवारीमा रहेका सूर्यचन्द्र न्यौपानेले राजीनामा दिएपछि यो पद रिक्त थियो ।
मुख्य न्यायाधिवक्ताको नियुक्ति प्रदेशका मुख्यमन्त्रीको सिफारिसमा प्रदेश प्रमुखले गर्ने संवैधानिक व्यावस्था छ । बत्तीस वर्षअघि अभिवक्ता बनेर कानूनी क्षेत्रमा लागेका थपलिया २०४८ देखि अधिवक्ताको रुपमा वकालत पेशामा क्रियाशील हुँदै दुई वर्षअघि वरिष्ठ अधिवक्ता बनेका थिए ।
तत्कालीन नेकपा एमालेको अनुशासन आयोगको सदस्य भएर काम गरेका थपलिया राजनीति शास्त्रमा एमए र कानूनमा एलएलएम हुन् ।
