एजेन्सी – स्पेनका प्रधानमन्त्री पेड्रो सान्चेजले मुलुकमा अब कोरोना भाइरस (कोभिड–१९) नियन्त्रणमा आउने जनाएका छन् । बीबीसीका अनुसार उनले स्पेनमा महामारीको सबैभन्दा खराब अवस्था सकिइसकेको जनाएका हुन् ।
बिहीबार उनले महामारीको आगो नियन्त्रणमा आउन शुरु भएको उल्लेख गरेका हुन् । उनले स्पेनले यो महामारीविरुद्ध पूर्ण जित हासिल गर्ने विश्वास व्यक्त गरे ।
बिहीबार सरकारी निकायले सार्वजनिक गरेको तथ्यांकअनुसार पछिल्लो २४ घण्टामा स्पेनमा छ सय ८३ जनाको कोरोना भाइरसबाट मृत्यु भएको छ । बुधबार सार्वजनिक गरिएको तथ्यांकअनुसार भने त्यसअघिको २४ घण्टामा सात सय ५७ जना मानिसको मृत्यु भएको थियो ।
स्पेनमा लकडाउन २६ अप्रिलसम्म बढाउने तयारी भइरहेको जनाइएकाे छ । प्रधानमन्त्री सान्चेजले स्पेनमा लगाइएको लकडाउनले संक्रमितको संख्यामा उल्लेख्य कमी आएको उल्लेख गरेका छन् ।