गजल १
दिएर वचन उठाउने, फाली बनी धस्नेको सेखी झार्नै पर्छ,
न्यानो स्नेहिल काख देखाई जाली बनी कस्नेको सेखी झार्नु छ॥१॥
गुनको बदलामा बैगुनमात्रै गर्नेहरू धेरै रहेछन् यहाँ,
नेपाली भएर दुस्मनको गोटी बनी फस्नेको सेखी झार्नु छ॥२॥
सचेत बन्नै पर्छ यहाँ, खाटा बसेको घाउ कोट्याउनेदेखि नि,
खील निकाल्छु भन्दै नाभीमा शूल बनी बस्नेको सेखी झार्नु छ॥३॥
जुटाउनेको नाटक गर्दै फुटाउने त झनै हुन्छन् विषालु,
फाटेको सिलाउने नौटङ्की, सियो बनी पस्नेको सेखी झार्नु छ॥४॥
कहिल्यै कदापि छोड्नु हुँदैन यस्ता छद्मभेषीहरूलाई यहाँ,
पुष्पमालाको रूप लिएर सर्प बनी डस्नेको सेखी झार्नु छ।॥५॥
गजल २
नछुट्टिने गरी यी हातहरू समाएका छौं,
जसोतसो दुई चार पैसा नि कमाएका छौं॥१॥
सन्तोषमा नै सुख हुन्छ भन्ने कुरा बुझेर,
दुःख सुख गर्दै छुट्टै संसार जमाएका छौं॥२॥
चारैतिर जतिसुकै भाँजाहरू भए पनि,
पूर्ण विश्वासमा सम्बन्धलाई थमाएका छौं॥३॥
दुःख पीडा सबलाई धैर्यताले जित्न सके,
हुन्छ जीवन स्वर्गसरी भन्ने ठमाएका छौं॥४॥
बन्छ अमर प्रेम हाम्रो भन्ने विश्वास गर्दै,
निःस्वार्थ मायामा डुबुल्की मार्दै रमाएका छौं॥५॥
गजलमा मेरो पहिलो प्रयास
चन्द्रा न्यौपाने जन्मः तनहूँ
हालः टोखा नगरपालिका – ८,
जलपाचोक, काठमाडौं।
