एजेन्सी – फिलिपिन्समा सरकारी सुरक्षाकर्मी र विद्रोहीका बीचमा भएको झडपमा परी कम्तीमा १२ जनाको मृत्यु भएको सिन्ह्वाले जनाएको छ। मृत्यु भएकामध्ये दुई जना सुरक्षाकर्मी रहेको अधिकारीहरुले जानकारी दिएका छन्। त्यसैगरी घाइते भएका १३ जना पनि सुरक्षाकर्मी नै रहेका छन्।
सेनाका प्रवक्ताले बिहीबार दिएको जानकारी अनुसार दक्षिणी फिलिपिन्सको मगुइन्डानाओ प्रान्तमा झडप भएको हो।
फिलिपिन्सका लेफ्टिनेन्ट कर्णेल एन्होभिक एन्टिलानोले बाङसामोरो इस्लामिक स्वतन्त्रता सङ्ग्राम (बिआइएफएफ) का नेता हसन इन्डाल कहाँ छन् भन्ने पहिचान गरेर आक्रमण गरिएको जनाए । स्थानीय समय अनुसार विहान ५.३० बजेतिर २० आतङ्ककारीहरूलाई लक्षित गरेर सुरक्षाकर्मीहरुले सुरक्षा कारबाही गरेको उनले जानकारी दिए।
सुरक्षाकर्मीहरुले झण्डै छ घण्टा आक्रमण गरेको र त्यसपछि आक्रमण स्थगित गर्ने निर्णय गरेको थियो। एटीलानोले विद्रोहीतर्फका अरू धेरै घाइते भएको हुनसक्ने जनाइएकाे छ ।
