काठमाडौं । नेपाल विद्युत् प्राधिकरणलाई १० अर्ब ऋण लिन सरकारले स्वीकृति दिएको छ । विद्युत् प्राधिकरणका अनुसार अर्थ मन्त्रालयले अल्पकालीन ऋण लिने प्राधिकरणको प्रस्तावलाई बुधवार स्वीकृत गरेको हो ।
प्राधिकरणको नेतृत्वमा आएसँगै शाक्यले प्राधिकरणको स्वेतपत्र जारी गर्दै अल्पकालीन ऋण लिने निर्णय गरेका थिए । उक्त निर्णयअनुसार अल्पकालीन ऋण लिनको लागि अर्थ मन्त्रालयको स्वीकृतका लागि प्राधिकरणले प्रस्ताव पठाएको थियो ।त्यसपछि शाक्यले हरेक कार्यक्रममा प्राधिकरणले आवश्यक भौतिक पूर्वाधार निर्माणको लागि पर्याप्त रकम प्राधिकरणसँग नभएको बताउँदै आएका छन् । प्रसारण लाइन तथा ट्रान्समिसन थप गर्नको लागि लगानीको आवश्यक रहेको उनले धारणा राख्दै आएका छन् ।
शाक्यले जारी गरेको स्वेतपत्रमा प्राधिकरणले चालु आर्थिक वर्षको फागुन मसान्तसम्म ठेक्काको लागि ११ अर्ब ६१ करोड रुपैयाँ भुक्तानी गर्न बाँकी रहेको उल्लेख थियो । त्यसैले प्राधिकरणले भुक्तानीका लागि जगेडा पैसा नरहेको र त्यसका लागि १० अर्बसम्म अल्पकालीन ऋण लिने प्रक्रिया अगाडि बढाएको थियो ।प्राधिकरणको कोषमा १० अर्ब १० करोड रकम रुपैयाँ रहेको छ । जसमा डलर/नेरू मुद्दती खातामा तीन अर्ब ६८ करोड र धरौटी खातामा तीन अर्ब ९५ करोड रुपैयाँ रहेको प्राधिकरणले जनाएको छ ।
