काठमाडौं । विश्वकप विजेता अर्जेन्टिनी कप्तान लियोनेल मेस्सी आगामी डिसेम्बर मा भारत आउने भएका छन् । उनी आफ्नो ‘गट इन्डिया टुर २०२५’अन्तर्गत भारत आउन लागेका हुन् ।
उनले भारतमा रहँदा चार शहरहरू- कोलकाता, अहमदाबाद, मुम्बई र नयाँ दिल्ली भ्रमण गर्ने तालिका तय भएको छ।
उनले उक्त टुरका क्रममा १३ डिसेम्बरदेखि कोलकाताबाट भारत भ्रमण थाल्नेछन् । त्यसपछि उनी अहमदाबाद, मुम्बई र नयाँ दिल्ली पुग्नेछन् ।
उनको भारत भ्रमणका क्रममा ‘गट कप’ इभेन्ट, फ्यान मीट, फुटबल क्लिनिक, सांगीतिक र मनोरञ्जन कार्यक्रम आयोजना गरिनेछ ।
ठूलो भीड र धेरैको आकर्षण हुने अनुमान गर्दै आयोजकहरूले सुरक्षा र व्यवस्थापनका लागि विशेष तयारी अहिलेबाटै थालेका छन् ।
यसकारण भारत आउँदै ?
मेसीले आधिकारिक रुपमा आफ्नो इन्स्टाग्राम/सोशल मिडियामा भारत भ्रमण गर्ने घोषणा गरेका छन्। उनले भारतलाई ‘एकदम विशेष देश’ भन्दै सन् २०११ पछिको पहिलो भारत भ्रमणका लागि उत्साह व्यक्त गरेका छन्।
‘भारतका फुटबल-प्रेमी दर्शकहरू मलाई याद आइरहेको छ। यस पटक नयाँ पुस्तासँग भेट्न र फुटबल प्रेम बाँड्न चाहन्छु’, उनले भनेका छन् ।
यसकारण महत्वपूर्ण ?
मेस्सीले सन् २०११ पछि पहिलो पटक भारत भ्रमण गर्न लागेका हुन् । लामो समयपछि मेस्सी भारत आउने कारणले फ्यानहरुमा उत्साह छ ।
फुटबल मात्रै नभइ सांस्कृतिक र मनोरञ्जनात्मक कार्यक्रम पनि हुने भएकाले उत्साह देखिएको हो । जसले फुटबल, क्रिकेट र बलिउड प्रेमी मात्रै नभई सांगीतिक-मनोरञ्जनप्रेमी समुदायलाई पनि जोड्ने छ ।
फुटबल-क्लिनिक र युवा खेलाडीहरूसँग अन्तरक्रियाले फुटबल विकास र युवा सक्रियताका लागि अवसर दिने विश्वास लिइएको छ।
