काठमाडौं । विश्वकै पूरानोमध्येको भेनिस फिल्म फेस्टिभलमा वर्ल्ड प्रिमियर भएको फिल्म ‘द रेड सुटकेस’ आगामी चैत ३० मा प्रदर्शनमा आउने भएको छ । अंग्रेजी नयाँ वर्षको अवसरमा अन्तर्राष्ट्रिय बजार घुमेको यो फिल्मको प्रदर्शन तय भएको हो ।
‘विश्वका विभिन्न प्रतिष्ठित फिल्म फेस्टिभलको यात्रा गरेको चलचित्र ‘द रेड सुटकेस’, अब घरेलु दर्शक माझ लिएर आउँदैछौं । अंग्रेजी नयाँ वर्ष २०२४ को शुभकामनासहित द रेड सुटकेस चैत ३० मा नेपाल भर प्रदर्शनमा ल्याउने जानकारी गराउन चाहन्छौं । साथै आम दर्शकको माया र साथको अपेक्षा गर्दछौं,’निर्माता रामकृष्ण पोख्रेलले चलचित्रको प्रदर्शन मितिसहितको पोस्टर सार्वजनिक गर्दै सामाजिक सञ्जालमा लेखेका छन् ।
फिडेल देवकोटा निर्देशित यो चलचित्र भेनिससँगै मुम्बईको मामी फेस्टिभल, जर्मनीको म्यानहाइम हेडेलवर्ग, जेनेभिया, सर्वियालगायतमा अझै घुम्दैछ । चलचित्रमा वैदेशिक रोजगारीको विषय समेटिएको छ ।
कतारबाट आइपुगेको एउटा सामग्री लिएर त्रिभुवन विमानस्थलबाट एक पिकअप ट्रक गन्तव्यतर्फ अगाडि बढ्दै गरेको दृश्यबाट चलचित्रको कथा सुरु हुन्छ । त्यही समय विमानस्थलबाट अर्का प्रवासी कामदार रातो सुटकेस बोकेर निस्कन्छन् । त्यो सामग्रीलाई गन्तव्यसम्म पुर्याइदिने यात्रामा हिँडेका पिकअप ड्राइभर बिस्तारै रहस्यमयी घटनाहरूमा फस्दै जान्छन् ।
चलचित्रमा अभिनेता सौगात मल्ल, विपिन कार्की, सृष्टि श्रेष्ठ र प्रवीण खतिवडाको अभिनय छ ।
