संसदीय सुनुवाइ समितिबाट प्रधानन्यायाधीशमा अस्वीकृत सर्वोच्च अदालतका वरिष्ठ न्यायाधीश दीपकराज जोशी नियमित काममा फर्किने भएका छन्। नवनियुक्त प्रधानन्यायाधीश ओमप्रकाश मिश्रको स्वागतका लागि सोमबार सर्वोच्च अदालत पुगेका जोशीले नागरिकसँग भने, ‘सर्वोच्च त आजै (सोमबार) बाटै आएँ, भोलि (मंगलबार) देखि नियमित काममा फर्कनेछु।’
शैक्षिक प्रमाणपत्र विवादका कारण प्रधानन्यायाधीश हुनबाट रोकिएपछि जोशी घरबिदामा बसेका थिए। जोशीले आफूले प्रधानन्यायाधीश नभएर कार्यवाहक प्रधानन्यायाधीशको जिम्मेवारीमात्र सम्हालेको जनाए । ‘म प्रधानन्यायाधीशको कुर्सीमा बसेको त होइन नि’, उनले भने, , ‘नवनियुक्त प्रधानन्यायाधीशलाई सर्वोच्चमा मैले नै स्वागत गरेर कुर्सीमा राखिदिएको हुँ।’
जोशीले मिश्र र आफू सहकर्मी भएकाले कार्यसम्पादनमा कुनै समस्या नपर्ने जनाए। घरबिदामा रहेका जोशी प्रधानन्यायाधीश मिश्रलाई स्वागत गर्न सोमबार साँझ अदालत पुगेका थिए । मिश्रलाई अंकमाल गर्दै प्रधानन्यायाधीशको कुर्सीमा बसाएर उनी फर्केका थिए। नागरिक दैनिकबाट ।