हेटौँडा / प्रदेश नं ३ का मुख्यमन्त्री डोरमणि पौडेलले असत्य समाचार लेख्नु र विरोध मात्र गर्नु पत्रकारिताको धर्म विपरीत काम भएकाले सत्यतामा रहेर समाचार सम्प्रेषण गर्नुपर्ने जनाउनुभएको छ ।
प्रेस चौतारी मकवानपुर र प्रेस सेन्टर मकवानपुरद्वारा आज हेटौँडामा आयोजित बृहत् पत्रकार भेटघाट कार्यक्रममा उहाँले कतिपय पत्रकारले असत्य समाचार लेखेर सरकारको विरोध मात्रै धेरै गर्न थालेको भन्दै यसबाट सच्चिनुपर्ने धारणा राख्नुभयो ।
फरक प्रसङ्गमा मुख्यमन्त्री पौडेलले प्रदेश ३ मा भ्रष्टाचार गर्न पाइँदैन भनेर कर्मचारी आउन नमानेको भन्ने कुरा सुनेकाले प्रदेश ३ मा भ्रष्टाचार हुन्न भन्ने कुरा देशैभर फैलिएकाले आफूलाई गर्व लागेको जनाउनुभयो । त्यस्ता कर्मचारीहरु आउन नमाने पनि प्रदेश सरकार आफ्नो योजनाबाट पछि हट्दैन उहाँले भन्नुभयो ।
आन्तरिक मामिला तथा कानूनमन्त्री शालिकराम जम्कट्टेलले प्रदेश ३ का मुख्यमन्त्री नै अत्यन्तै मितव्ययी रहेको तथा सबै मन्त्रीहरु पनि असल आचरणको भएको ठोकुवा गर्दै कतिपय पत्रकारले प्रदेश सरकारविरुद्ध गलत समाचार दिएको जनाउनु भयो । उहाँले प्रदेश सरकारले कुनै पनि गलत र विवादित काम नगरेको र नगर्ने जनाउँदै प्रदेश ३ को मुख्यमन्त्री तथा मन्त्रीहरु लगायतको सरल जीवनशैली एवं व्यवहारका कारण प्रदेश सरकारले कुनै विवादित काम नगरेको जनाउनुभयो।
अर्थ, मामिला तथा योजनामन्त्री कैलाश ढुङ्गेलले प्रदेश सरकार पत्रकारिता क्षेत्रको विकासका लागि तयार रहेको भन्दै पत्रकारहरुको क्षमता वृद्धि गर्न वा पत्रकारलाई सहयोग गर्न तयार रहेको जनाउनु भयो ।