पोखरा । नेपाली कांग्रेसका सभापति शेरबहादुर देउवाले वर्तमान सरकार प्रेस स्वतन्त्रतामाथि आक्रमण गर्न उद्यत् रहेको आरोप लगाउँदै प्रेसमाथि हुने कुनै किसिमका हस्तक्षेप कांग्रेसलाई सह्य नहुने जनाएका छन् ।
नेपाल प्रेस युनियन कास्कीको नवौँ अधिवेशन तथा पुरस्कार वितरण समारोहको पोखरामा उद्घाटन गर्दै उनले सभापति देउवाले प्रेस स्वतन्त्रता र प्रजातन्त्र एक अर्कामा अन्योन्याश्रित भएको जनाए । वर्तमान सरकार हरेक क्षेत्रमा असफल भएको जनाउँदै उनले हिजो जथाभावी सपना बाँडेको सरकारले जनअपेक्षाअनुरूप काम गर्न नसकेको आरोप लगाए ।
२००७ सालदेखि प्रेस स्वतन्त्रता एवं लोकतन्त्रका पक्षमा निरन्तर संघर्ष गरेको कांग्रेस लोकतन्त्रको रक्षा एवं प्रेस स्वतन्त्रताका पक्षमा सधैँ क्रियाशील बन्ने विश्वास व्यक्त गरे । उक्त अवसरमा सभापति देउवाले नेपाल प्रेस युनियन कास्कीले स्थापना गरेको प्रेस युनियन राष्ट्रिय पत्रकारिता पुरस्कारबाट अग्रज पत्रकार कविर राणा र समीरजंग शाहलाई सम्मान गरे ।
३५ हजार ५ सय ५५ रुपैयाँ नगदसहितको उक्त पुरस्कार दुई जनालाई संयुक्तरूपमा प्रदान गरिएको हो । कार्यक्रममा नेपाल प्रेस युनियनका केन्द्रीय अध्यक्ष बद्रि सिग्देलले प्रेस स्वतन्त्रता एवं लोकतन्त्रका विरुद्धमा हुने जुनसुकै क्रियाकलापमा सशक्त कलम चलाउनुपर्नेमा जोड दिए ।
नेपाल पत्रकार महासंघका केन्द्रीय अध्यक्ष गोविन्द आचार्यले नेपालमा प्रजातन्त्र एवं प्रेस स्वतन्त्रताको आन्दोलनमा प्रेस युनियनले खेलेको भूमिका महत्वपूर्ण रहेको जनाए । नेपाली कांग्रेस कास्कीका सभापति कृष्ण केसीले संविधानले दिएका अधिकारलाई पनि वर्तमान सरकारले नियन्त्रण गर्न खोजेको आरोप लगाउँदै संविधानको रक्षा र लोकतन्त्रको विकासका पक्षमा कलम चाल्नुपर्ने धारणा राखे ।
