काठमाडौं / नेपालका लागि अष्ट्रेलियन राजदूत पेटे बुडले नेपाली नेताहरु विदेशमा पक्राउ पर्न सक्ने जनाएका छन् ।
संक्रमणकालिन न्यायलाई सम्बोधन गर्न ढिलाइ भइरहेको भनेर चिन्ता व्यक्त भइरहेको बेला उनले प्रत्यक्ष तथा अप्रत्यक्ष रुपमा गम्भीर प्रकृतिका मानवअधिकार हननका घटनामा सहभागी नेताहरु अष्ट्रेलियालगायतका मुलुकमा भ्रमण गर्दा पक्राउ पर्न सक्ने जनाएका हुन् ।
मंगलबार उनकै कार्यालयमा सञ्चारकर्मीसँगको अन्तरक्रियामा राजदूत बुडले दशक लामो माओवादी द्वन्द्वका बेला भएका गम्भीर किसिमका मानव अधिकार उल्लंघनका घटनालाई सम्बोधन गर्न राजनीतिक दलका नेताले ढिलाइ गरेकोप्रति चासो व्यक्त गरेका हुन् ।
राजदूत बुडले पीडितले स्वतन्त्र रुपमा उजुरी दिएमा प्रत्यक्ष वा अप्रत्यक्ष रुपमा गम्भीर किसिमका मानव अधिकार उल्लंघनका घटनामा संलग्न राजनीतिक दलका नेताहरु संयुक्त राष्ट्रसंघ महासन्धिको विश्वव्यापी क्षेत्राधिकार अन्तर्गत कुनै पनि मुलुकमा पक्राउ पर्न सक्ने आजको नागरिक दैनिकमा उल्लेख छ ।