एजेन्सी – मंगलबार अमेरिकामा कोरोना भाइरस (कोभिड–१९) बाट एकैदिन अहिलेसम्मकै धेरै मानिसको मृत्यु भएको छ ।
बीबीसीले जनाए अनुसार मंगलबार अमेरिकामा एक हजार सात सय ३६ जनाको मृत्यु भएको हो । यससँगै अमेरिकामा यो भाइरसबाट मृत्यु हुने मानिसको संख्या पनि १२ हजार सात सय २२ पुगेको छ । करिब तीन लाख ९८ हजारभन्दा धेरै मानिसमा यो भाइरसको संक्रमण देखिएको छ ।
विश्वभर यो भाइरसबाट संक्रमितको संख्या १४ लाख नाघिसकेको छ । यद्यपि अमेरिकी राष्ट्रपति डोनाल्ड ट्रम्पले अमेरिकामा मृतकको संख्या अब बिस्तारै घट्न सक्ने जनाएका छन् । यसअघि अप्रिल ४ मा सबैभन्दा धेरै एक हजार तीन सय ४४ जनाको मृत्यु भएको थियो । मंगलबार घोषणा गरिएको मृत्युको संख्यामा अझै केही राज्यको तथ्यांक समावेश हुन बाँकी रहेको बताइएको छ ।
चीनको वुहानबाट महामारीका रूपमा अहिले विश्वभर फैलिएको अमेरिकामा यस भाइरसबाट सबैभन्दा धेरै प्रभावित हुने मुलुक बनेको छ । भाइरसको उद्गमस्थल वुहानको लकडाउन भने बुधबारदेखि खुलेको छ ।
