नागरिकता विधेयकबारे छलफल गर्ने आइतबार सिंहदरबारमा बसेको राज्य व्यवस्था तथा सुशासन समितिको बैठकमा सांसद महतोले सीमाको ‘चेलीबेटीको सम्बन्ध’ सिंहदरबार र दिल्ली दरबारले नबनाएको भन्दै नागरिकता कानुनमा सत्तारूढ नेकपाले भनेजस्तो सात वर्षको बन्देज लगाएका परिवारभित्र राष्ट्रियता विभाजन हुने धारणा राखे ।
‘संविधान र कानुन अनुभूत गर्ने सक्ने हुनुपर्छ। यसअघिका कानुनले किन विवाह गरी आउने महिलालाई सीमा लगाएको थिएन भनेर सोच्नु पर्दैन,’ महतोले भने,‘सदियौंदेखि चलिआएको सम्बन्ध उल्ट्याएर अहिले कहाँ प्रहार गर्न खोजेको हो?’
उनले वैवाहिक नागरिकता लिएकाले नभई वंशजको नागरिकता लिने नै राष्ट्रघात गरेको भन्दै त्यस्ता राष्ट्रघातीहरूको पर्दाफास गर्नुपर्नेमा जाेड दिए ।
उनले सात वर्षको प्रावधान संविधानको मर्मविपरीत हुने पनि तर्क गरे।
‘अहिलेसम्म जन्मसिद्धका सन्तानले नागरिकता पाउन सकेका छैनन। जनस्तरका समस्यामा सरकार यति असंवेदनशील बन्नु हुन्न,’उनले भने।
छलफलमा बोल्दै प्रमुख प्रतिपक्षी नेपाली कांग्रेसका सांसदहरूले सात वर्षे प्रतिबन्ध लगाउने हो भने संविधान संशोधन गर्नुपर्ने माग गरेका छन्।