काठमाडौं । लुम्बिनी प्रदेश सरकारले विपद्मा परेका नागरिकलाई आफ्नै खर्चमा हवाई उद्धार गर्ने भएको छ ।
आन्तरिक मामिला, कानुन तथा सञ्चार मन्त्रालयले हवाई उद्धार सम्बन्धी कार्यविधि २०७९ तयार पारेको छ । यस अनुसार प्रदेश भित्र प्राकृतिक तथा गैर(प्राकृतिक विपद्मा परेका नागरिकको ज्यान बचाउन हवाई उद्धार सेवा दिइने छ । सो प्रयोजनका मन्त्रालयले वायुसेवा कम्पनीहरूसँग प्रस्ताव आह्वान समेत गरेको छ ।
बिहीबार एक सूचना प्रकाशित गर्दै मन्त्रालयले कार्यविधि अनुसार ७ दिन भित्र मन्त्रालयमा प्रस्ताव पेस गर्न आह्वान गरिएको छ ।
प्रदेश भित्र विपद्मा परी ज्यान जोखिममा परेका व्यक्तिलाई हवाई उद्धार गरी सुरक्षित स्थानमा अवतरण गराउने, घाइते भएका व्यक्तिलाई उपचारको आवश्यकता परेमा अस्पतालमा पुर्याउने र अन्य माध्यमबाट सम्भव नभएमा राहत वितरणमा समेत हवाई सेवा प्रयोग गर्ने गरी मन्त्रालयले प्रस्ताव मागेको हो ।
भीषण आगलागीको समयमा आगलागी नियन्त्रणमा समेत हवाई सेवा प्रयोग गर्न सकिने गरी कार्यविधि बनेको छ । यस्तो सेवा लुम्बिनी प्रदेशभर लागु हुने भएको छ ।
हिमपात, असिना, हिमपहिरो, हिमताल विष्फोटन, अतिवृष्टि, अनावृष्टि, बाढी, पहिरो तथा भू(स्खलन, डुबान, खडेरी, आँधी, हुरी बतास, शीतलहर, तातो हावाको लहर, चट्याङ, भूकम्प, ज्वालामुखी विस्फोट, डढेलो वा यस्तै प्राकृतिक विपद्बाट उत्पन्न विपद्बाट पीडित नागरिकले यो सेवा पाउने छन् ।
