काठमाडौं । गृह मन्त्रालयले मंसिर ४ गते हुने प्रतिनिधि सभा र प्रदेश सभा निर्वाचन बिथोल्नका लागि देशभर २३ वटा समूह सक्रिय रहेको निष्कर्ष निकालेको छ ।
प्रदेश १ को विराटनगरमा आयोजित प्रदेशस्तरीय सुरक्षा गोष्ठीमा मन्त्रालयका प्रवक्ता फणिन्द्रमणि पोखरेलले बहिष्कारदेखि लिएर चुनावलाई शान्तिपूर्ण रूपमा सम्पन्न गर्न नदिन विभिन्न २३ समूह सक्रिय रहेको जानकारी दिनुभएको हो ।
निर्वाचनलाई शान्तिपूर्ण, भयरहित र निष्पक्ष रूपमा सम्पन्न गर्न विशेष सुरक्षा योजना बनाएर लागू गरिएको जानकारी दिँदै प्रवक्ता पोखरेलले निर्वाचनमा खटिने कर्मचारी,उम्मेदवार, मतदाता, निर्वाचन सामग्री सबैको सुरक्षा सरकारको प्राथमिकतामा परेको बताउनुभयो ।
मतदानका दिन ३ घेराको सुरक्षा प्रबन्ध गरिने जानकारी दिँदै उहाँले पहिलो घेरामा नेपाल तथा म्यादी प्रहरी, दोस्रोमा सशस्त्र प्रहरी र तेस्रो घेरामा नेपाली सेनालाई परिचालन गरिने बताउनुभयो ।
सरकारले निर्वाचन सुरक्षाका लागि म्यादीसहित २ लाख ९८ हजार ५ सय ८९ जना सुरक्षाकर्मी परिचालन गर्ने यसअघि नै निर्णय गरिसकेको छ ।
