पार्टीका अध्यक्ष डा. सिके राउतको नेतृत्वमा आइतबारबाट उक्त यात्रा सुरू भएको हो।
स्थानीय उम्मेदवारलाई जिताएर स्थानीय जनताको स्वाभिमान रक्षा गर्न स्वाभिमान यात्रा सुरू गरिएको पार्टीका नेता बिपी साहले बताए।
उनका अनुसार कोल्हवी गाउँपालिकाबाट सुरू भएको यात्रा करैयामाई, सुवर्ण, देवताल नगरपालिका लगायत निर्वाचन क्षेत्र नम्बर २ का सबै ठाउँमा पुग्नेछ।
आइतबार कोल्हवीमा यात्राको क्रममा राउत घरघर पुगेका थिए। उनले ठाउँठाउँमा आफ्ना पार्टीका उम्मेदवार जिताउनुपर्ने कारण बताएका थिए।
नेता साहका अनुसार स्थानीय जनताको मान सम्मान र स्वाभिमान रक्षाका लागि यो अभियान सुरू गरिएको हो।
‘यसअघि पटकपटक बाहिरका उम्मेदवारहरूले चुनाव जितेर जाँदा यस क्षेत्रमा विकास भएन। बाहिरका उम्मेदवारहरूले आफ्नो स्वार्थ मात्र पूरा गर्दा शिक्षा, स्वास्थ्य, पूर्वाधारमा समस्या भएको छ,’ नेता साहले भने, ‘जनमत पार्टीले यस क्षेत्रको विकास र किसानको समस्या बुझ्ने नेता तथा शिवचन्द्र प्रसाद कुशवाहालाई उम्मदवार बनाएको छ। स्थानीय उम्मेदवार पाउँदा स्थानीय बासिन्दा खुसी छन्। त्यसकारण सहजै जनमतका उम्मेदवार विजयी हुनेछन्।’
राउतले निर्वाचनको मिति घोषणा हुनासाथ जनता समाजवादी पार्टीका अध्यक्ष उपेन्द्र यादवलाई बाहिरिया उम्मेदवार भन्दै प्रहार गरिरहेका छन्।
