काठमाडाैं । भारतमा ‘मोका’ नामको शक्तिशाली चक्रवात आउने चेतावनी जारी गरिएको छ।
सोमबार दक्षिणपूर्वी बंगालको खाडी र नजिकैको दक्षिण अण्डमान सागरमा न्यून चापीय क्षेत्र बनेको छ। चक्रवात यही मे १२ (वैशाख २९) मा बंगलादेश र म्यानमारको तटतर्फ अघि बढ्ने अनुमान गरिएको छ।
भारतीय सञ्चारमाध्यमका अनुसार पश्चिम बंगालमा मोका चक्रवातको प्रभाव यो आँधी तटीय क्षेत्रबाट बंगलादेशतर्फ कति टाढा पुग्छ भन्नेमा निर्भर गर्दछ।
भारतीय मौसम विभागले पश्चिम बंगाल, ओडिसा र आन्ध्र प्रदेशका लागि पनि अलर्ट जारी गरेको छ।
सोमबार पश्चिम बंगालकी मुख्यमन्त्री ममता बनर्जीले विज्ञप्ति जारी गर्दै चक्रवातबाट डराउनुपर्ने आवश्यकता नरहेको बताएकी छन्।अप्ठ्यारो परेमा तटीय क्षेत्रका जनतालाई उद्धार गरिने उनले उल्लेख गरेकी छन्।
The low pressure area over Southeast Bay of Bengal and adjoining South Andaman Sea has become Well Marked Low Pressure Area over the same region at 0530 IST today, the 9th May 2023. It is very likely to intensify into a depression by today evening over the same region
— India Meteorological Department (@Indiametdept) May 9, 2023
नेपालमा प्रभाव पर्ला?
मौसम पूर्वानुमान महाशाखाका मौसमविद्ले अहिलेसम्म त्यसको प्रभाव नेपालमा पर्ने सम्भावना नदेखिएको बताएका छन्।
नेपालखबरको जिज्ञासामा महाशाखाका मौसमविद् राजु प्रधानांगले मंगलबार बिहान भने, ‘अहिलेसम्म हेर्दा त्यो चक्रवातको प्रभाव नेपालमा पर्ने देखिँदैन, त्यो बंगालको दक्षिण–पूर्वी भागमा बनेको छ र त्यसले उत्तर–पूर्वी म्यान्मारतिर असर गर्ने देखिन्छ।’
