जलेश्वर । ११० फिट अग्लो राष्ट्रिय झन्डाको समुद्घाटनको लागि उपराष्ट्रपति रामसहाय प्रसाद यादव मटिहानी आउने भएका छन् ।
मटिहानी नगरपालिकाका नगरप्रमुख हरिप्रसाद मण्डलले मटिहानी वडा नं. ७ स्थित तस्मैया बाबा पार्कमा निर्माण गरिएको ११० फिट अग्लो राष्ट्रिय झन्डाको समुद्घाटनको लागि निमन्त्रण गरेपछि साउन १६ गते मङ्गलवार उपराष्ट्रपति यादव मटिहानी आउने कार्यक्रम रहेको जनाइएको छ ।
साउन १६ गते मङ्गलवार बिहान १० बजे मटिहानी आउनुहुने उपराष्ट्रपति यादवले झन्डाको समुद्घाटन गरेपश्चात् उहाँ नागरिक अभिनन्दन कार्यक्रममा मटिहानी भ्रमण कार्यक्रम तय भएको मटिहानी नगरपालिका प्रमुख हरिप्रसाद मण्डलले बताउनुभएको छ ।
उपराष्ट्रपति यादवले मटिहानी भ्रमणको क्रममा पौराणिक एवं धार्मिक लक्ष्मीनारायण मन्दिरमा पूजापाठ गर्नुका साथै तस्मैया बाबाको दर्शन गर्नुहुनेछ भने लक्ष्मी सागर पोखरीमा भगवान् लक्ष्मीनारायणको आरती गर्ने कार्यक्रम रहेको जनाइएको छ ।
यसैगरी उहाँले नेपालकै जेठो राजकीय संस्कृत माध्यमिक विद्यालयको निरीक्षण अवलोकन गर्नुका साथै पिर बाबा मजारको पनि दर्शन अवलोकन गर्नुहुने कार्यक्रम रहेको जनाइएको छ ।
