काठमाडौं । जनता समाजवादी पार्टीका प्रमुख सचेतक प्रदीप यादवले नेपाल विद्युत् प्राधिकरणले उद्योगीहरूबाट विद्युतको अर्बौं रकम किन नउठाएको भन्दै प्रश्न गरेका छन् । प्रतिनिधिसभाको मंगलबारको बैठकमा सांसद यादवले सर्वसाधारण जनतालाई एक महिना विद्युत् महसुल नतिरे २५ प्रतिशत जरिवाना र तीन महिनाभित्र नतिरे लाइन काट्ने प्राधिकरणले उद्योगीलाई अर्बौंको बक्यौता किन नउठाएको र लाइन किन नकाटेको भन्दै प्रश्न उठाएका हुन् ।
प्रतिनिधिसभाको सार्वजनिक लेखा समिति र अदालतले समेत उद्योगीहरूबाट विद्युतको बक्यौता महसुल उठाउन आदेश दिए पनि विद्युत् प्राधिकरण र सरकारले काम नगरेको भन्दै सांसद यादवले प्रश्न उठाएका हुन् ।
२०७२ सालमा लोडसेडिङका क्रममा उद्योगी र प्रतिष्ठित कार्यालयहरूले ट्रंक लाइन र डेडिकेडेट लाइनमार्फत विद्युत् लिएका थिए । नेपालका प्रतिष्ठित उद्योगीहरूले विद्युत् प्राधिकरणमा निवेदन दिई ट्रंक लाइन र डेडिकेडेट फिडरबाट विद्युत सेवा लिएको यादवले बताए । ‘देशभर २९८ उद्योग प्रतिष्ठानले विद्युत् लिएका थिए । त्यसमध्ये २४० ले महसुल तिरे तर ५८ उद्योगी र प्रतिष्ठानले अटेरी गरी विद्युत् महसुल तिरेरन्,’ उनले भने ।
नेपाल विद्युत् प्राधिकरणका कार्यकारी निर्देशक कुलमान घिसिङले उद्योगीहरूबाट बक्यौता रकम उठाउन तदारुकता नदेखाएको भन्दै यादवले प्रश्न उठाएका हुन् ।
सरकारले भने अर्बौंको विद्युत महसुल बक्यौता उठाउन ध्यान किन नपुर्याएको भन्दै सत्तारुढ दलका सांसदले प्रश्न उठाएका हुन् ।
