काठमाडौं । आफूमाथि कारबाही गर्ने अखिल नेपाल फुटबल संघ (एन्फा) अनुशासन समितिको निर्णयविरुद्ध थ्री स्टार क्लबले पुनरावेदन समितिमा अपिल गरेको छ ।
शहीद स्मारक ए डिभिजन लिगमा जावलाखेल युथ क्लबविरुद्ध भिसा अवधि सकिएका दुई विदेशी खेलाडी खेलाएको भन्दै अनुशासन समितिले थ्री स्टारलाई करबाही गरेको थियो ।
एपीएफ क्लबले भिसा अवधि सकिएका दुई विदेशी खेलाडी खेलाएको भन्दै उजुरी दियो । एन्फाको अनुशासन समितिले १५ पुसमा थ्री स्टारका नाइजेरियन खेलाडीद्वय मार्टिन कायोडे अजायी र पिटर सेगुनलाई जनही ५० हजार तथा थ्री स्टारलाई तीन लाख रुपैयाँ जरिवाना गर्यो ।
लिग सम्पन्न हुनुपर्ने समयमा नभएका कारण भिसा प्रक्रिया पूरा हुन नसकेको भन्दै निवेदनमा भनिएको छ । ‘भिसा प्रक्रिया चलाएकामा प्रकृयागत ढिलाइ भएको हुँदा खेलाडी तथा क्लबलाई जरिवाना गराउने गरी भएको अनुशासन समितिको निर्णय फुटबल खेलको भावना र मर्म विपरीत भएको निर्णय त्रुटिपूर्ण छ ।’
साथै यसबारे जाउलाखेल बाहेक अरु क्लबलाई उजुरी गर्ने अधिकार नभएको थ्रीस्टारको दाबी छ । अनुशासन समितिले थ्री स्टारलाई जरिवाना मात्र गरेकोमा एपीएफले यसअघि नै असन्तुष्टी जनाएको थियो । नियम विपरीत खेलाडी सहभागी गराउने टिमलाई पराजित मान्नु पर्ने एपीएफको माग छ ।
