काठमाडौं । आगामी मंसिर ५ देखि १४ गतेसम्म काठमाडौंमा ‘नेपाल अन्तर्राष्ट्रिय बाल-चलचित्र महोत्सव’ हुने भएको छ। विश्व कला दिवसको अवसरमा एलाइन्स फर चिल्ड्रेन फिल्म नेपाल (एसिएफ नेपाल) ले पहिलो पटक महोत्सव आयोजना गर्ने लागेको हो।
राष्ट्रिय तथा अन्तर्राष्ट्रिय बाल–चलचित्र प्रदर्शन गरिने महोत्सवमा १८ वर्षभन्दा मुनिका फिल्म निर्माता (योङ्ग फिल्म मेकर) को फिल्म प्रतियोगिता तथा कार्यशाला गरिनेछ।
बालबालिकाको कला तथा बाल–पुस्तक प्रदर्शनीसहित बाल चलचित्र र यसको प्रभाबारे छलफल, निर्णायकको रुपमा बालबालिका समावेश तथा सहभागिता लगायतका कार्यक्रम तय भएका छन्।
बालबालिकाको सिकाइको प्रक्रियामा चलचित्र माध्यमलाई समावेश गराउने तथा चलचित्र साक्षरताको विकास गर्ने उद्देश्य रहेको संस्थाका अध्यक्ष तथा नाट्यकर्मी केदार श्रेष्ठले जानकारी गराए।
