काठमाडौं । पत्रकार तथा साहित्यकार लक्ष्मण वियोगीको पहिलो कथासङ्ग्रह ‘सत्यम्’ सार्वजनिक गरिएको छ। पेज टर्नर प्रालिको प्रकाशनमा आएको यो कृति जेठ २४ गते शनिबार नेपाल प्रज्ञा प्रतिष्ठानको लेखनाथ सभाकक्षमा एक समारोहबीच लोकार्पण गर्न लागिएको हो ।
दुई दशकदेखि नेपाली पत्रकारिता क्षेत्रमा सक्रिय वियोगीले यस कृतिमा मुख्यतः पश्चिम नेपाल, विशेषतः स्याङ्जा जिल्लाको भाषा, संस्कृति, जीवनशैली तथा माओवादी जनयुद्धको सन्दर्भ समेटिएका विविध सामाजिक आयामहरू प्रस्तुत गरेका छन्।
पेज टर्नरका कार्यकारी निर्देशक जयराम तिमल्सिनाका अनुसार ‘सत्यम्’ मा समावेश कथाहरू यथार्थवादी धारा प्रतिनिधित्व गर्छन्। सामाजिक विभेद, असमानता, युद्धका पीडा तथा लोकसंस्कृतिको सजीव चित्रण कथाहरूको विशेषता हो। बाल्यकालका सम्झनामा मिसिएका लोकभाकाको स्पर्श र पहाडी जनजीवनको सुगन्ध कथाहरूमा झल्किन्छ।
वियोगीले यसअघि नेपाल समाचारपत्र, नागरिक दैनिक लगायतका विभिन्न पत्र–पत्रिकामा कार्य अनुभव सँगालेका छन्। हाल उनी ऊर्जा क्षेत्रमा केन्द्रित अनलाइन तथा अर्धवार्षिक पत्रिका ‘ऊर्जा खबर’ का सम्पादकका रूपमा कार्यरत छन्।
कथा र निबन्ध विधामा विशेष रुचि राख्ने वियोगीको साहित्यिक योगदान उल्लेखनीय छ। ‘कोरोनाको कर्खा’ शीर्षक निबन्धले ‘कविडाँडा राष्ट्रिय निबन्ध प्रतियोगिता २०७८’ मा प्रथम स्थान हासिल गरेपछि उनले लेखनमा छुट्टै पहिचान बनाएका छन्। यस्तै, ‘डिसहोम–बाह्रखरी’ राष्ट्रव्यापी कथा प्रतियोगितामा उनको कथा ‘टाउको’ दोस्रो स्थानमा परेको थियो। उनले रचना गरेका करिब दर्जनजति आधुनिक तथा लोक–आधुनिक गीतहरू पनि रेकर्ड भइसकेका छन्।
‘सत्यम्’ कथासङ्ग्रह वियोगीको कथा लेखन यात्राको नयाँ अध्यायको रूपमा रहेको छ, जसले समकालीन नेपाली समाजको विविधता, विडम्बना र सुन्दरतालाई साहित्यिक स्वर दिइरहेको छ।
