२०४४ सालमा तत्कालीन नेकपा मालेका तर्फबाट राष्ट्रिय पञ्चायतको सदस्य भएर निर्वाचित भएका पदमरत्न तुलाधर उत्पिडनका विषय उठाउँदा संसदमै रोएका थिए ।
त्यो ०४४ को वर्षे अधिवेशनको कुरा थियो । त्यतिबेलाका पञ्च हालका राप्रपा अध्यक्ष कमल थापाले रोएर प्रजातन्त्र पाइदैन भनेर प्रतिवाद गरेका थिए । उनी बहुदलको माग गर्दा पनि रोएका थिए । तर पञ्चहरुले उनको रुवाइलाई उपेक्षा गरेको त्यतिबेला तुलाधरसँगै मालेका तर्फबाट सांसद बनेका सोमनाथ अधिकारी प्यासी बताउँछन् । उहाँ एकदम भावुक मान्छे हुनुहुन्थ्यो, अधिकारी भन्छन् । त्यतिबेलाको राष्ट्रिय पञ्चायतमा जनपक्षिय राष्ट्रिय पञ्चायतको सदस्य भएर निरंकुश राजतन्त्र र निर्दलीय पञ्चायतका विरुद्ध आवाज उठाउने तुलाधर सहित सोमनाथ अधिकारी लगायत पाँच जना सांसद थिए । तर हाउसमा बोल्दा उनले कहिल्यै पनि मालेको सदस्य हुँ भनेर भनेनन् ।
उनले स्वतन्त्र वामपन्थी हुँ भन्थे । राजा वीरेन्द्रसँग भेटघाट गर्दा राजा वीरेन्द्रसँग रात्रीभोजमा पदमरत्न लगायतले ०४४ मा राजासँग स्पष्टसँग बहुदल मागेका थिए । त्यही माग गरेबापत अधिकारी र जाग्रितप्रसाद भेटवाल १५÷१५ दिन निलम्बनमा परे, तुलाधरलाई पनि निलम्बन गर्ने कुरा थियो तर उनी निलम्बनमा परेनन् । उनै तुलाधरको सोमबार दिउसो मस्तिष्क घातको उपचारका क्रममा थापाथलीस्थित नर्भिक अस्पतालमा निधन भएको छ । उनको आज अन्तिम संस्कारको तयारी रहेको आफन्तहरुले बताएका छन् ।