प्रधानमन्त्री सुशील कोइराला संयुक्त राष्ट्रसङ्घको ७०औँ महासभामा भाग लिन बुधबार न्युयोर्क जाने भएपछि तत्काललाई नयाँ सरकार गठनको प्रक्रियामा केही ढिलाई हुने भएको छ । १० दिने अमेरिका भ्रमण जान लागेका प्रधानमन्त्री कोइरालाका कारण नयाँ सरकार गठन प्रक्रिया केही ढिला हुन लागेको हो ।
नयाँ संविधान प्रारम्भ भएको मितिले सात दिनभित्र संसदको अधिवेशन राष्ट्रपतिले आह्वान गर्ने र त्यसको सात दिनभित्रै प्रधानमन्त्री चयन गर्ने व्यवस्था रहेपनि प्रधानमन्त्रीको विदेश भ्रमणले सरकार गठन प्रक्रिया पछि सर्ने संकेत देखिएको हो ।
संयुक्त राष्ट्रसङ्घको ७०औँ महासभामा भाग लिन १८ सदस्यीय नेपाली प्रतिनिधि मण्डलको नेतृत्व गर्दै न्युयोर्क जान लागेका प्रधानमन्त्री कोइरालाले असोज १४ गते सम्बोधन गर्ने कार्यक्रम तय तय भएको छ । असोज ११ देखि १८ गतेसम्म हुने संयुक्त राष्ट्रसङ्घको महासभामा सहभागी भएर स्वदेश फर्किएपछिमात्र सरकार निर्माणको प्रक्रिया अघि बढने प्रमुख दलहरुले जनाएका छन् ।
