एजेन्सी, अमेरिकाको राष्ट्रिय समुद्री तथा वायुमण्डलीय प्रशासन एनओएए( नेशनल ओसेनिक एण्ड एटमोस्फेरिक एडमिनिस्ट्रेशन) ले विमानलाई खराब स्थितिका बारेमा जानकारी दिने उपग्रह अन्तरिक्षमा पठाएको छ । एनओएएले यो उपग्रहले बादलका तरंगका बारेमा स्पष्ट तस्विर पृथ्वीमा पठाउन सक्ने जनाएको छ । बादलका तरंगले नै वायुमण्डलमा हलचल पैदा हुने एनओएएले जनाएको छ । यसका अतिरिक्त उक्त उपग्रहले हावाको गति, कुहीरो, आइस र बिजुलीका बारेमा धेरै अनुमान गर्न सक्ने एनओएएले दाबी गरेको छ । यो उपग्रह अन्तरिक्षमा पठाइएकोमा पाईलटहरुले खुसी व्यक्त गरेका छन् । सन २०१७ को मध्यसम्ममा उक्त उपग्रहले विभिन्न तथ्यांकहरु पठाउन सुरु गर्ने छ । उपग्रहले पठाउने तथ्यांक तथा तस्विरको आधारमा एयरलाइन कम्पनी तथा पाइलटहरुलाई सुरक्षीत रुट बनाउन मद्दत पुग्ने अपेक्षा गरिएको छ । हाल जीओईस–आर उपग्रहलाई विश्वको सबैभन्दा उन्नत मौसम उपग्रह मानिन्छ । नयाँ उपग्रहले आँधी, बाढी, ज्वालामुखीबाट निस्कने बादल, जंगलमा लागेको आगो तथा चट्यानले भरिएको आँधीका बारेमा पनि छिटो भन्दा छिटो जानकारी दिनसक्ने दाबी गरिएको छ । करिब एक अर्ब अमेरिकी डलर खर्च गरेर निर्माण गरिएको यस उपग्रह आकाशलाई सुक्ष्म ढंगले अध्ययन गर्ने मामिलामा पुरानो संस्करणको तुलनामा पाँच गुँण छिटो गर्ने दाबी गरिएको छ । एनओएएका अनुसार नयाँ उपग्रहले पठाएका तस्वीरको रेज्युलेशन पनि पहिले भन्दा चार गुँणा स्तरिय हुनेछन् ।
