एजेन्सी अफगानिस्तानमा विगत लामो समयदेखि सङ्घर्षरत रहेका तालिबान विद्रोही समूहले संयुक्तराज्य अमेरिकासँग वार्ता प्रक्रियामा रहेपनि सशस्त्र सङ्घर्षलाई अझ तीव्र बनाउने आज शुक्रबार निर्णय गरेका छन् ।
अङ्ग्रेजी समेत पाँच भाषामा प्रकाशित लामो वक्तव्यमा तालिबान विद्रोहीले अफगानिस्तानमा विदेशी फौज रहेसम्म सङ्घर्षलाई निरन्तरता दिइने जनाइएको छ । हुनत, तालिवानले यस्तो घोषणा हरेक वर्ष गरिरहेको छ । हिउँदका कठिन दिनहरुमा पनि तालिबानी आक्रमण रोकिएका छैनन् । तालिवानले दिनहुँजसो अफगान सुरक्षाफौज र अफगानिस्तानमा तैनाथ नेटो फौजमाथि आक्रमण गरिरहेका छन् ।
तालिवानी आक्रमणबाट सुरक्षाकर्मी, लडाकू र सर्वसाधारणको मृत्यु हुनेक्रम घट्नुको साटो पछिल्ला वर्षहरुमा अझ बढेको छ । पछिल्लो समय, तालिबानले बाघ्रामस्थित अमेरिकी हवाई अखाडामा गत सोमबार गरेको आत्मघाती आक्रमणमा तीन जना अमेरिकी सैनिकको मृत्यु भएको थियो । विभिन्न अध्ययनले अफगानिस्तानको आधाभन्दा बढी भूभागमा तालिबान समूहले कब्जा गरेको देखाएका छन् । मूलतः अफगानिस्तानमा अमेरिकी अतिक्रमणका विरुद्ध विगत १७ वर्षदेखि तालिबान र इस्लामिक स्टेट्स समूहले सशस्त्र सङ्घर्ष गरिरहेको छ ।
आज भएको घोषणामा तालिबानले आफ्ना लडाकूहरुलाई पूर्ण इमान्दारी र तालिवान कमान्ड संरचना बमोजिम आक्रामक कारबाही अघि बढाउन निर्देशन दिएका छन् । घोषणामा नागरिक हताहत रोक्न भरमग्दुर प्रयास गर्न लडाकूहरुलाई निर्देश दिइएको छ ।
यसै वर्षको शुरुमा प्रकाशित राष्ट्रसंघको वार्षिक प्रतिवेदन अनुसार गत वर्ष सन् २०१८ मा ठूलो संख्यामा सर्वसाधारणको मृत्यु भएको छ । नागरिकको हत्या हुनुमा मुख्यतः तालिबानी लडाकू र अरु विद्रोहीहरु दोषी देखिएका छन् । अमेरिकी हवाई आक्रमणबाट पनि ठूलो संख्यामा नागरिक हताहत भएको पाइएको छ । अमेरिकी हवाई आक्रमणहरु खासगरी प्रत्यक्ष लडाइँमा संलग्न अफगानी फौजको सहयोगका लागि हुने गरेका छन् ।
तैपनि, कतारमा अर्को सातादेखि अफगानी समूहहरुबीच वार्ता शुरु हुँदैछ । कतारमा तालिबानको कार्यालय समेत रहेको छ । यता काबुलमा, सरकार विरोधी पक्षसँग शान्ति वार्ता गर्न एक वर्ष अघि स्थापना गरिएको अफगान उच्च शान्ति परिषदले तालिबानको पछिल्लो वक्तव्यप्रति निन्दा गरेको छ । अफगान युद्धको शान्तिपूर्ण समाधानमा विद्रोहीहरु इमान्दार रहेकामा यस वक्तव्यले शङ्का उब्जाएको परिषदले जनाएको छ ।
परिषदका उपप्रमुख अट्टा–उ–रहमान सलेमले भने, ‘उनीहरुले युद्ध नै चाहेको देखिन्छ । उनीहरुका हरेक दिनका क्रियाकलापले यसैलाई पुष्टी गरिरहेको छ ।’ अमेरिकी अफगान शान्तिदूत जाल्मे खलिलजादले तालिबानसँग युद्धविराम गर्न र काबुल सरकारसँग वार्ताका लागि आग्रह गरिरहेका छन्, तर विद्रोहीहरुले यी दुबै प्रस्ताव अस्वीकार गरेका छन् ।
तालिवानले अफगान सरकारसँग वार्ता नगर्ने बताउँदै आएको छ । कतारमा वार्ताका लागि आउने अफगान टोलीलाई तालिबानले सरकारी प्रतिनिधि नभई सर्वसाधारण अफगान नागरिक ठान्ने गरेको छ ।
