रियो दि जेनेरियो । नेपाली तेक्वान्दो खेलाडी निश्चित कार्कीले आईएसएफ यू-१५ जिम्न्यासाइडमा स्वर्ण पदक जितेका छन् ।
ब्राजिलको रियो दि जेनेरियोमा सञ्चालन भइरहेको प्रतियोगिताअन्तर्गत मंगलबार भएको कलरवेल्ट पुम्सेको फाइनलमा उनले ब्राजिलका खेलाडीलाई पराजित गरी स्वर्ण जितेका हुन् ।
यसअघि निश्चितले सेमीफाइनलमा मेक्सिकोलाई हराएका थिए । मेक्सिकोले ६.८ अंक जोड्दा निश्चितले ७.४अंक प्राप्त गरेका थिए ।
जितसँगै ११ राष्ट्रले प्रतिस्पर्धा गरेको गर्ल्स बास्केटबलमा नेपालले नवौं स्थान हात पारेको छ।
यसैगरी ब्वाइज थ्री अन थ्री वास्केटबलमा नेपाल ‘ए’ले ब्राजिललाई७-६ स्कोरले तथा मेक्सिकोलाई १०-६ ले हरायो । अर्को खेलमा भने कोस्टारिकासँग ९-८ ले पराजित हुनपुग्यो ।
त्यसैगरी ब्वाइज नेपाल ‘बी’ भने ब्राजिलसँग ११- ८ पराजित भयो ।
भदौ १० सम्म सञ्चालन हुने प्रतियोगितामा ४४ राष्ट्रका २ हजार खेलाडीले विभिन्न १८ खेलमा प्रतिस्पर्धा गरिरहेका छन् ।
नेपालबाट पाँचवटा खेलहरु बक्सिङ, पौडी, तेक्वान्दो, टेबल टेनिस र बास्केटबलमा २१ जना खेलाडीहरुले प्रतिस्पर्धा गरिरहेका छन् ।
अन्तर्राष्ट्रिय स्कुल स्पोर्टस महासंघ (आईसी)को आयोजनामा हरेक दुई वर्षमा आयोजना हुने यो १५ वर्ष उमेर समूहको ‘मिनी ओलम्पिक’ प्रतियोगिता हो ।
