काठमाडौं । २०३९ सालमा गाविस सचिवबाट सरकारी सेवा प्रवेश गरेको एक कर्मचारीले ३७ वर्षमा १८ करोडभन्दा धेरै स्रोत नखुल्ने सम्पत्ति गैरकानुनी गतिविधीबाट आर्जन गरेको पाइएको छ।
२०३९ साल साउन १ गते स्याङ्जाबाट गाविस सचिवको रुपमा प्रवेश गरेर अवकाश पाउँदा काठमाडौंको टोखाका विभिन्न स्थानमा घडेरी, बैंक मौज्दात र कम्पनीहरुको शेयर जम्मा गर्ने व्यक्ति हुन्, ऋषिराम अर्याल।
हालैमात्र टोखा नगरपालिको कार्यकारी अधिकृतबाट अवकाश पाएका अर्यालले यो अवधिमा यसरी आर्जन गरेको सम्पत्ति श्रीमती र दुई छोराको नाममा राखेको अख्तियार दुरुपयोग अनुसन्धान आयोगको अभियोगमा उल्लेख छ। विशेष अदालतमा अर्यालसहित सबैलाई प्रतिवादी बनाएर अख्तियारले बुधवार भ्रष्टाचार मुद्दा दायर गरेको हो।
श्रीमती र दुई छोरालाई अख्तियारले सम्पत्ति जफतको प्रयोजनका लागि विपक्षी बनाएको हो। गत वर्षमात्र अवकाश पाएका अर्यालले यो अवधिमा आर्जन गरेको सम्पत्तिमध्ये ८ करोड ७७ लाख २७ हजार बराबर मात्र स्रोत पुष्टि भएको अख्तियारको आरोपपत्रमा उल्लेख छ।
सार्वजनिक सेवामा प्रवेश मितिदेखि आ.व. २०७५।०७६ सम्मको अवधिलाई जाँच अवधि लिएर गरिएको अनुसन्धानमा अर्याल तथा श्रीमती लक्ष्मीदेवी उपाध्याय अर्यालको नाममा दर्ता कायम रहने गरी घर तथा जग्गा खरिदको स्रोत पुष्टि हुन नसकेको आरोपपत्रमा उल्लेख छ।
अर्यालको सम्पत्ति
– अर्याल र श्रीमतीको नाममा रहेको जग्गाको ५ करोड ४४ लाख ८५ हजार
– घर निर्माणमा ४१ लाख १० हजार ४ सय २५
– पुँजीगत लाभ तथा आयकर ४ लाख ९६ हजार १ सय २६
– विभिन्न बैंक तथा वित्तीय संस्था एवं कम्पनीहरुका साधारण तथा संस्थापक शेयर खरिदमा ९ करोड १३ लाख ७८ हजार १ सय २१
– विभिन्न बचत तथा सहकारी संस्थाहरुमा भए गरेको लगानी २ लाख ५० हजार
– छोरी छोराहरुको अध्ययनमा २० लाख ३२ हजार ३ सय ६६
– छोराछोरीहरुको विवाहमा २८ लाख
– जीवन बीमा वापतको प्रिमियम शुल्कमा ४ लाख १० हजार
– विभिन्न बैंक तथा वित्तीय संस्थाहरुबाट लिएका कर्जा चुक्तामा १ करोड ७६ लाख ४६ हजार
– न्यू लिङ्क कापी उद्योग र एल.डि.इन्टरप्राइजेज फर्मसमेतमा लगानी ४ करोड ४२ लाख ५० हजार
– सवारी साधन खरिदमा १२ लाख
– सुन खरिदमा ४ लाख
– दान र सरसापटी व्यवहारमा ४ करोड ५० लाख ३३ हजार
– बैंक खाताहरुमा अन्तिम मौज्दात रकम १५ लाख ७६ हजार ७ सय ४८ रुपैया
अख्तियारले अर्यालको यो सबै सपत्ति अनुसन्धानको क्रममा फेला पारेको विशेष अदालतमा दायर गरेको मुद्दामा उल्लेख छ। यो अवधिमा उनले २६ करोड ६० लाख ६९ हजार खर्च गरेको अख्तियारको आरोपपत्रमा उल्लेख छ।
अख्तियारको आरोपपत्र अनुसार अर्यालले यो अवधिमा विभिन्न स्थानमा गरेको लगानी र परिवारको आम्दानीबाट ८ करोड ७७ लाख २७ हजार आम्दानी गरेको अख्तियारको आरोपपत्रमा उल्लेख छ।
अर्यालले सार्वजनिक सेवामा प्रवेश गरेदेखि अवकाश पाएको २०७६ आषाढ मसान्तसम्म १७ करोड ८३ लाख ४१ हजार ५ सय ७९ रुपैया स्रोत पुष्टि नै हुन नसकेको अख्तियारको आरोपपत्रमा उल्लेख छ। अर्यालले ८ करोड ७७ लाख २७ हजार ४ सय ८३ बैक आम्दानीबाट आर्जन गरेको २६ करोड ६० लाख ६९ हजार ६२ रुपैया विभिन्न स्थानमा लगानी र खर्च जोड्दा कुल सम्पत्ति देखिएको अख्तियारको आरोपपत्रमा उल्लेख छ।
अवकाश पाउनुअघि मात्र घरजग्गामा लगानी
३७ वर्षदेखि सरकारी सेवामा कार्यरत रहेका अर्याले अवकाश पाउनुभन्दा केही समयअघि मात्र आफूसँग भएको अवैध आम्दानी घर जग्गामा लगानी गरेको अख्तियारको आरोपपत्रमा उल्लेख छ। ३६ वर्षसम्म अन्यत्रै लगानी गर्दै आएका अर्याल टोखा नगरपालिको कार्यकारी भएपछि सोही ठाउँमा जग्गा खरिद गर्न सक्रिय भएका थिए।
‘टोखा नगरपालिकाका तत्कालीन कार्यकारी अधिकृत ऋषिराम अर्यालले विभिन्न तबरले अकुत सम्पत्ति कमाएको र ठाउँठाउँमा घर जग्गा जोडी आफ्नो कार्यकालका कर्मचारीलाई समेत दबाबमा पारी नगरपालिकालाई भ्रष्टाचारको अखडा बनाएको देखिन्छ’, अख्तियारको आरोपपत्रमा भनिएको छ, ‘गैरकानुनी सम्पत्ति आर्जन गरी उच्च जीवनयापन गरिरहेको भन्ने आयोगमा प्राप्त हुन आएको उजुरीमाथि छानबिन हुँदा अर्यालको गैरकानुनी आर्जन खुलेको हो।’
अर्याल राष्ट्रसेवक कर्मचारीको रुपमा लामो समय काठमाडौं जिल्लाका साविकको धापासी गाविस, टोखा सरस्वती गाविस र भीमढुंगा गाविसमा सचिवको रुपमा कार्यरत रही टोखा नगरपालिकामा निमित्त कार्यकारी अधिकृतको रुपमा काम गरेका थिए। अर्यालले अनुसन्धानको क्रममा बयान गर्दा समेत सम्पत्ति आर्जनको वैधानिक स्रोत एवं वस्तुनिष्ठ आधार प्रमाणहरु प्रस्तुत गरी आयभन्दा बढी देखिएका व्यय रकमहरुको स्रोत पुष्टि गर्न नसकेको अख्तियारको आरोपपत्रमा उल्लेख छ।
विद्यमान सम्पत्तिको स्रोत नखुलेको हुँदा निजको सम्पत्ति विवरण अमिल्दो र अस्वाभाविक देखिएकोले आफ्नो हैसियतभन्दा बढी रकम खर्च लगानी गरी आफू तथा श्रीमती र छोराहरुको नाममा घर जग्गाहरु खरिद¸ विभिन्न बैंक तथा वित्तीय संस्थाहरु तथा कम्पनीहरुका संस्थापक एवं साधारण शेयरहरु खरिद लगानी लगायतका चल र अचल सम्पत्तिहरु खरिद, विभिन्न उद्योग तथा फर्म एवं सहकारीहरुमा लगानी, विभिन्न बैंक तथा वित्तीय संस्थाहरुमा रकम जम्मा एवं घर निर्माण लगायत गरेको आरोपपत्रमा उल्लेख छ।
अख्तियारले अर्याललाई भ्रष्टाचार निवारण ऐन बमोजिम कैद सजायको पनि माग गरेको छ।
श्रीमती र दुई छोरा पनि प्रतिवादी
अख्तियारले गैरकानुनी रुपमा आर्जन गरेको सम्पत्ति लुकाउने प्रयोजनका लागि मतियार भएको भन्दै श्रीमती लक्ष्मीदेवी उपाध्याय अर्याल तथा छोराहरु सुशील अर्याल र सुनिल अर्याल समेतलाई प्रतिवादी बनाएको छ।
उनीहरुलाई अवैध आर्जनको सम्पत्तिहरु जफत प्रयोजनार्थ प्रतिवादी कायम गरी बुधबार विशेष अदालत काठमाडौंमा मुद्दा दायर भएको अख्तियारले जनाएको छ। अख्तियारले अर्यालसँग कैद, अवैध आर्जन बराबरको बिगो र सोही बराबर जरिवाना र आर्जन गरेको सम्पत्ति जफत गर्न माग गरेको छ।
