यस वर्षको पुरस्कार डा. आइडेन लेर्चलाई शोधग्रन्थका लागि प्रदान गरिएको छ। ‘न्यायालयहरूले न्याय सम्पादन गर्दा मुद्दाको अन्तिम किनारा नलाग्दै कुनै पक्षलाई तत्काल हुन सक्ने अन्यायबाट रोक्न कस्तो प्रकारका आदेश दिन सक्दछन्’ भन्ने विषयमा केन्द्रित उनको शोधग्रन्थका लागि प्रदान गरिएको हो।
डा. लेर्चको उक्त शोधग्रन्थ यो वर्षको अक्सफोर्ड विश्वविद्यालय कानुन संकायको सर्वोत्कृष्ट शोधग्रन्थमा छनौट भएको थियो।
अक्सफोर्ड विश्वविद्यालयबाट विद्यावारिधि गरेका प्राध्यापक सुवेदीलाई उक्त विश्वविद्यालयले सन् २०१९ मा प्राज्ञिक क्षेत्रको सर्वोच्च उपाधि महाविद्यावारिधि प्रदान गरेको थियो भने सन् २०२० मा प्रा सुवेदीको नाममा उक्त वार्षिक पुरस्कार स्थापना गरेको थियो।
प्राध्यापक सुवेदी बेलायतको लिड्स विश्वविद्यालयमा अन्तर्राष्ट्रिय कानुनका प्राध्यापक एवं बेलायतका ब्यारिष्टर र केसी हुन्। उनलाई दुई वर्षअघि अक्सफोर्ड विश्वविद्यालयको एक्सेटर कलेजले अन्तर्राष्ट्रिय कानुनको क्षेत्रमा असाधारण योगदान दिएको व्यक्ति भन्दै आजीवन मानार्थ प्राज्ञ निर्वाचित गरेको थियो।
