काठमाडाैं – सत्तारूढ नेपाल कम्युनिष्ट पार्टीको स्थायी समिति बैठकमा प्रधानमन्त्री तथा पार्टी अध्यक्ष केपी शर्मा ओली अनुपस्थित भएका छन् ।
बालुवाटार स्रोतका अनुसार अर्का अध्यक्ष प्रचण्डले बैठक चलाउने भन्दै प्रधानमन्त्री ओली उपस्थित छैन् ।
यसअघि बुधबार सुरू भएको बैठकमा प्रधानमन्त्री ओलीले आफ्ना धारणा राखेका थिए। आफूले पार्टीभित्र, बाहिर र अन्तर्राष्ट्रिय रूपमा समेत प्रतिपक्षीहरू झेल्नु परेको उनको गुनासो थियो।
संसारभरि कम्युनिष्टहरू कमजोर भएको बेला नेपालमा दुई तिहाइ बहुमतको सरकार कम्युनिष्टको नेतृत्वमा बनेको अन्तर्राष्ट्रिय जगतलाई समेत मन नपरेको प्रधानमन्त्री ओलीले बताएका थिए। चौतर्फी समस्याका बीचमा पनि सरकारले सकरात्मक काम गरिरहेको भए पनि पार्टीभित्रै बाट साथ नपाएको ओलीको दु:खेसो छ।
लिम्पियाधुरासम्मको भू-भाग समेटेर नक्सा जारी गरेकोमा भारतीय पक्ष खुसी नरहेको ओलीले जनाएका थिए।
‘यही बेला भारतसँग सीमा विवाद झेल्नुपर्यो। सीमाको विषयमा भारतीय सेनापति बोल्नु भनेको हस्तक्षेप नै हो,’ प्रधानमन्त्री ओलीको भनाइ उद्धृत गर्दै एक स्थायी समिति सदस्यले भने,’कोरोनाभाइरसको महामारी पनि यही बेलामा भयो। तर हामीले नियन्त्रणका लागि सक्दो काम गरेका छौं। यही बीचमा विकास निर्माणका काम पनि भएका छन्।’
प्रधानमन्त्रीले नेपालमा कोरोनाभाइरसका कारण भएको भनिएको संख्या पनि थोरै रहेको जनाएका थिए। ‘मृत्यु भएका सबैको कोरोना कारण होइन। विश्व स्वास्थ्य संगठनका कारणले मात्रै यो संख्या देखिएको हो,’ ओलीले भनेका थिए,’कानुनी रूपमा देखाउन परेको भए पनि व्यवहारिक रूपमा यो संख्या यथार्थ होइन।’
राम्रो सोचले अध्यादेश ल्याइएको भए पनि पार्टीभित्रै बाट असहयोग भएको उनले जनाएका थिए।
‘विधेयकले पार्टी फुट्छ भनेर गलत कुरा गरियो। संवैधानिक आयोगहरूमा पनि पार्टीका मान्छेहरूलाई नियुक्त गर्न सकिन्थ्यो,’ प्रधानमन्त्री ओलीको भनाइ उद्धृत गर्दै अर्का एक नेताले भने,’हाम्रो आधा कार्यकालमा समेत संवैधानिक निकायमा नियुक्ति गर्न सकिएको छैन।’
पार्टीभित्रका विपक्षीको सामान गर्न सबैभन्दा कठिन हुने ओलीको धारणा थियो। ‘हाम्रा साथीहरूले आफ्ना असन्तुष्टि पार्टीका बैठकमा राखे हुने हो तर बाहिर भन्दै हिँड्नुहुन्छ,’ उनले भने,’पार्टीका मान्छेले आलोचना गरेपछि जनताले पनि त्यही कुरा पत्याउँदा रहेछन्।’
बैठकमा बोल्दै अर्का अध्यक्ष पुष्पकमल दाहाल ‘प्रचण्ड’ ले भने ओलीको कार्यशैलीको आलोचना गर्दै पार्टीमा अहिलेकै भद्रगोल रहिरहे पार्टी विघटनको दिशामा जाने बताएका थिए। आजको बैठकमा अरू स्थायी समिति सदस्यले समसामयिक विषयमा आफ्नो धारणा राख्दैछन्।
