काठमाडौँ- नेकपाका प्रवक्ता नारायणकाजी श्रेष्ठले क्षणिक स्वार्थका लागि अनर्गल गालिगलौज एवम् झुठा प्रचारमा नलाग्न पार्टीका नेता तथा कार्यकर्ताहरूलाई आग्रह गरेका छन्। बिहीबार फेसबुकमा लेख्दै श्रेष्ठले कम्युनिस्ट राजनीति विचार, सिद्धान्त, मूल्यमान्यतालाई आधार बनाई छलफल गर्नुपर्ने बताएका हुन्। नेपाली कम्युनिस्ट आन्दोलन र नेपाली राजनीतिलाई विकृतीकरण र भ्रष्टीकरणबाट बचाउनुपर्ने श्रेष्ठको भनाइ छ।
उनले प्रतिनिधिसभालाई विघटन गरेर संविधानको उल्लंघन भएको समेत बताएका छन्। तर त्यसको विरुद्ध आफूहरूले संघर्ष गरिरहेको उनको भनाइ छ।‘संविधानको ठाडो उल्लंघन गरी प्रतिनिधिसभा विघटन गर्ने प्रतिगामी कदमको विरुद्ध हामी संविधान, संघीय लोकतान्त्रिक गणतन्त्र र समाजवाद उन्मुख समावेशी लोकतन्त्रको पक्षमा संघर्ष गरिरहेका छौं,’ फेसबुकमा उनले लेखेका छन्।
ओली पक्ष र प्रचण्ड-नेपालपक्ष बीच आरोपप्रत्यारोप चल्न थालेपछि श्रेष्ठले स्वच्छ बहस छलफलमा सहभागी हुन फेसबुकमार्फत् आग्रह गरेका हुन्।
