काठमाडौं । टोकियो ओलम्पिक २०२० मा नेपालको प्रतिनिधित्व गर्ने मध्येका एक खेलाडी पौडीका एलेक्जेन्डर (एलेक्स) शाह आज सोमवार जापानतर्फ प्रस्थान गर्दै छन्।
एलेक्स र उनका मुख्य प्रशिक्षक शंकर कार्की दुवै जना जापान प्रस्थान गर्न लागेका हुन्। नेपाल ओलम्पिक समितिले एलेक्स र कार्की दुवै जनालाई आइतवार विदाई गरिसकेको छ। एलेक्सले जापानको टोकुशिमामा आफ्नो तयारी गर्ने नेपाल ओलम्पिक समितिले जानकारी दिएको छ।
टोकुशिमा प्रान्त र पौडी टोलीबिच ट्रेनिङ बारे सम्झौता भइसकेको जानकारी पनि नेपाल ओलम्पिक समितिले दिएको छ। त्यस्तै पौडीकी अर्को खेलाडी गौरीका सिंह भने बेलायतबाट जापान जाने बताइएको छ।
१३औं साग प्रतियोगितामा ४ स्वर्ण पदक विजेता सिंह बेलायतबाट सोझै टोकुशिमा जान लागेकी हुन्। टोकियो ओलम्पिक जुलाई २३ देखि अगस्ट ८ सम्म हुनेछ। नेपाली पौडी टोली जुलाई २० मा ओलम्पिक भिलेजमा सम्मिलित हुनेछन्।
