जनकपुरधाम । दीपावली (तिहार) आर्थात् यमपञ्चकको चौथो दिन कात्तिक शुक्ल प्रतिपदाका दिन आज मिथिला क्षेत्रमा गोधन पर्व मनाइँदै छ।
विघ्ननाशक गणपतिको आह्वान गर्दै सुरु गरिने यो पूजा विधिमा प्रकृतिको आराधना भएको मैथिल विद्वान बताउँछन्।
द्वापरयुगमा श्रीकृष्णले गोकूल (तत्कालीन मथुरा राज्यअन्तर्गतको बस्ती) नजिकको गोवर्द्धन पर्वतलाई इष्टजनसहित पूजा गरेका परम्पराको सम्झनामा मिथिला क्षेत्रमा गोधन पर्व मनाउने गरिन्छ। गाई (गो) मुख्य पशुधन मानिने त्यो बेला श्रीकृष्णले गोवर्द्धन पर्वतले गाई पाल्न घाँस, पानी दिएको भन्दै सबैलाई इन्द्रको साटो पर्वतलाई पूजा गर्न हौस्याएका थिए। महाभारतकालीन कथावस्तु नै यो पर्वको परम्परा भएको मिथिला क्षेत्रका प्रसिद्ध साहित्यकार डा राजेन्द्र विमल बताउँछन्। पछि गोवर्द्धन पूजालाई नै मिथिलामा ‘गोधन’ भनिन लागिएको डा विमलको भनाइ छ।
कात्तिक शुक्ल प्रतिपदा अर्थात् यमपञ्चकको चौथो दिन मनाइने यस पर्वमा मिथिलाका कतिपय जाति समुदायमा महिलाले धान, सिन्दूर, फूल, दुबो र पिठार ओखलमा राखेर कुट्ने गर्छन्। यो मिश्रण गाई, गोरुसहितका पशुधनलाई रङ्गाउन प्रयोग गरिन्छ।
विभिन्न रङ्मा मिसाएर यो मिश्रणले रङ्गाउने गरेमा गाई, गोरु लगायत पशुधनमा कसैको आँखा नलाग्ने, देशान (रोगव्याधि) नलाग्ने मैथिल जनविश्वास छ।
पर्वको मुख्य पक्षचाहिँ प्रकृति (वन, पहाड, पानीका मुहान, चरनक्षेत्र) संरक्षणको सन्देश रहेको डा विमल बताउँछन्।
