काठमाडौं । राजनीतिकर्मी रवीन्द्र मिश्रले ढिलो नगरी संवैधानिक राजसंस्था पुनःस्थापना र संघीयता खारेज गरी नेपाललाई ‘हिन्दु–बौद्ध राष्ट्र’ मा रूपान्तरण गर्नुपर्ने बताएका छन् । उनले आफ्नो आउन लागेको पाँचौँ पुस्तक ‘विचारभन्दा माथि देश’मा यस्तो उल्लेख गरेका हुन् ।
उनले गणतन्त्र, संघीयता र धर्मनिरपेक्षताजस्ता विषय सैद्धान्तिक रूपमा गलत नभए पनि दिन प्रतिदिन संवेदनशील हुँदै गएको समेत उल्लेख गरेका छन् । नेपालको भूराजनीति र आन्तरिक परिस्थितिका कारण ती विषय नेपालको दूरगामी हितका लागि घातक भएको उनको निष्कर्ष छ ।
अब पृथ्वीनारायण शाहको दिव्योपदेश र बीपी कोइरालाको राष्ट्रिय एकता र मेलमिलापको नीतिलाई समायोजित रूपमा अंगीकार गर्नुको विकल्प नभएको उनको तर्क छ ।
“हामीभन्दा माथिको पुस्ताले स्वार्थकेन्द्रित नभई राष्ट्रकेन्द्रित राजनीति गरिदिएको भए आज देशको अर्थतन्त्र, सहर–बजार र स्वाभिमानको स्थिति यति नाजुक हुने थिएन । ६०–७० लाख युवा विदेशिन बाध्य हुने थिएनन् । आफ्नो सुविधा, लाभ, पद, प्रतिष्ठा र आसन्न चुनावलाई मात्र केन्द्रमा राखेर गरिने राजनीति राष्ट्रघात हो । आफ्नै लागि त जीवनमा गर्न सकिने अरू धेरै काम छन्, राजनीति गर्न पर्दैन । राजनीति भनेको देशकै लागि गर्ने हो । त्यसैले, कम्तीमा ३० वर्षपछिको नेपाललाई मनन गरेर यी विषय उठाएको हुँ,” मिश्रले पुस्तकमा लेखेका छन् ।
फाइनप्रिन्टले प्रकाशन गर्न लागेको उक्त पुस्तकबाट प्राप्त हुने सम्पूर्ण लेखकस्व (रोयल्टी) राजनीतिक शुद्धीकरणको अभियानमा जाने मिश्रले उल्लेख गरेका छन् ।
