बुटवल । लुम्बिनी प्रदेश सरकारका नवनियुक्त मन्त्री भण्डारीलाल अहिरले पद तथा गोपनियताको सपथ ग्रहण गरेका छन् । आइतबार मन्त्री नियुक्त भएका भण्डारीले आज सपथ लिएका हुन् । मुख्यमन्त्री लिला गिरीको सिफारिसमा प्रदेश प्रमुख अमिक शेरचनले जसपाका अहिरलाई आइतबार साँझ कृषि तथा भूमि सुधार मन्त्री नियुक्त गरेका थिए ।
त्यस्तै मुख्यमन्त्री गिरीले आन्तरिक मामिला, कानुन तथा सहकारी मन्त्रीको जिम्मेवारी खानेपानी मन्त्री चेतनारायण आचार्यलाई तोकेका छन् । यसअघि माओवादी केन्द्रबाट मन्त्री बनेकी कृष्णा केसीले पदबहाली अस्वीकार गरेपछि उनको पदवहाली नभएसम्म वा अर्को मन्त्री नियुक्त नभएसम्मका लागि आचार्यलाई उक्त जिम्मेवारी दिइएको हो ।
