काठमाडौं । कांग्रेस सांसद तथा प्रतिनिधिसभाको राज्यव्यवस्था तथा सुशासन समितिका सभापति रामहरि खतिवडाले केही व्यक्ति तथा पार्टीले धर्मका नाममा राजनीति गरेर धार्मिक सद्भाव खल्बल्याउने काम भएको जनाएका छन् । उनले त्यसरी धार्मिक सद्भाव खल्बल्याउने काम बन्द गर्न आग्रह गरेका छन् ।
प्रतिनिधिसभाको आइतबारको बैठकमा सांसद खतिवडाले कोशी प्रदेश, सर्लाही र नेपालगन्जमा धार्मिक सद्भाव खल्बल्याउनका लागि राजनीतिक व्यक्तिहरू पनि सक्रिय रहेको बताए । त्यसरी धर्मको नाममा राजनीति गर्दा समाजमा सहिष्णुता खल्बलिएको जनाए।
धरान, सर्लाही र नेपालजन्जमा धार्मिक सद्भाव खल्बल्याउने काम भएको भन्दै तिनलाई तुरुन्त बन्द गर्नुपर्ने उनले जनाए ।
संसद्मा रहेका सबै राजनीतिक दलहरूले धार्मिक सहिष्णुताका लागि एकताबद्ध भएर अगाडि बढ्नुपर्ने खतिवडाको आग्रह थियो । ‘संसद्मा हुँदा केही गर्न नसकेपनि देशमा सबै पार्टीहरू एकताबद्ध छन् भन्ने सन्देश दिनुपर्ने आजको आवश्यकता महसुस गरेका छौं,’ उनले भने ।
