काठमाडौं । नेपाली कथानक ‘बोक्सीको घर’को दोस्रो श्रृंखला निर्माण हुने भएको छ । बिहीबार काठमाडौंमा आयोजित पत्रकार सम्मेलनमा निर्माताले चाँडै दर्शकले नयाँ सिक्वेल हेर्न पाउने जनाए ।
दुई दिनअघि नै हलमा चलिरहेको कथानक चलचित्रमा ‘टु बि कन्टिन्युड’ (निरन्तर रहनेछ) वाक्यांश राखिएको निर्मात्री तथा अभिनेत्री केकी अधिकारीले जनाइन् । ‘चाँडै नयाँ चलचित्र ल्याउने स्रोत र साहस मिलेको छ,’ चलचित्रबारे जानकारी दिन आयोजित प्रेसमिटमा उनले भनिन् ।
रिलिज हुँदा ‘कथा निरन्तर हुनेछ’ लेखिएको थिएन । तर निर्माताले केही दिनअघि मात्र थपेर हलमा पठाएका हुन् । यसको अर्थ, सिक्वेल बन्नेछ भनेर दर्शकलाई जानकारी दिइएको हो । प्रेसमिटमा निर्देशक भारतीले दोस्रो श्रृंखलाबारे अहिलेलाई केही नखुलाउने जनाए ।
उनले कथावस्तु बलियो हुनुपर्छ भन्ने पाठ यो फिल्मबाट सिकेको बताइन् । ‘हुन त म सहायक निर्मात्री रहेको कोहलपुर एक्सप्रेसबाट यो पाठ सिकेको हुँ । अहिले आएर यो पुष्टि भएको छ कि कथा बलियो हुनुपर्छ,’ केकीले प्रेसमिटमा भनिन् ।
उनले यो चलचित्र हिट हुँदा ऊर्जावान महसुस गरेको जनाइन् । यस्तो चलचित्र चल्दा नयाँ र प्रयोगात्मक चलचित्र बनाउने मेकरलाई ऊर्जा मिलेको समेत उनले जनाइन् ।
‘बोक्सीको घर’ केकीको करिअरकै उत्कृष्ट कमाइ गर्ने चलचित्र हो । यो चलचित्र उनको एकल लगानीको पहिलो फिल्म समेत हो । केकी अधिकारी फिल्म्सको ब्यानरमा यसको निर्माण गरिएको हो ।
