रविमाथि राहदानी र सहकारी प्रकरणमा छानबिन हुनुपर्ने

5

काठमाडौं ।  राष्ट्रिय स्वतन्त्र पार्टीको महामन्त्री र प्रवक्ता पदबाट निलम्बित मुकुल ढकालले सभापति रवि लामिछानेमाथि राहदानी दुरुपयोग र सहकारीको रकम ठगी प्रकरणमा छानबिन हुनुपर्ने जनाएका छन् ।

बुधबार काठमाडौंमा पत्रकार सम्मेलन गर्दै ढकालले रविका कारण पार्टी गम्भीर संकटतिर गएको भन्दै यी दुई प्रकरणमा उनीमाथि छानबिनका लागि उच्चस्तरीय समिति बनाउनुपर्ने जनाएका छन् ।

ढकालले केही दिनअघि सर्वोच्च अदालतका न्यायाधीशहरू सपना प्रधान मल्ल र सारंगा सुवेदीले सहकारी प्रकरणमा रविविरुद्ध छानबिन अघि बढाउन भनिसकेको उल्लेख गरे । सर्वोच्चले नैतिकताका आधारमा रविले स्वार्थ बाझिने गृहमन्त्रालयबाट मार्ग प्रशस्त गर्नुपर्ने भने पनि पदमै बसिरहेको भन्दै कडा आलोचना गरे ।

‘रविबारे सहकारी ठगी प्रकरणमा पार्टीले उच्चस्तरीय समिति बनाएर छानबिन हुनुपर्छ । रविको क्लबले यो काम गर्दैन, रास्वपाले छानबिन थाल्नुपर्छ’, उनले भने, ‘राहदानी दुरुपयोग प्रकरणमा उनीमाथि फेरि छानबिन हुनुपर्छ । राहदानीमा दोषी देखिएमा उहाँले जीवनभर चुनाव लड्न पाउनु हुन्न ।’

ढकालले रविको प्रकरण पार्टी जीवनसँग जोडिएकाले राहदानी दुरुपयोगबारे छानबिनका लागि उच्चस्तरीय समिति बनाउनुपर्ने दोहोर्‍याए ।

LEAVE A REPLY

Please enter your comment!
Please enter your name here