काठमाडौं । चालु आर्थिक वर्ष २०८१/८२ को पहिलो पाँच महिनामा नेपालले ३१९ परियोजनाका लागि २० अर्ब ७७ करोड बराबरको वैदेशिक लगानी प्रतिबद्धता प्राप्त गरेको छ। उद्योग विभागद्वारा प्रकाशित प्रत्यक्ष वैदेशिक लगानी स्वीकृतिको मासिक प्रतिवेदनअनुसार मंसिरमा मात्र २ अर्ब ११ करोड बराबरको लगानी प्रतिबद्धता प्राप्त भएको छ।
स्वचालित प्रक्रियाबाट १३८ परियोजनाका लागि २ अर्ब १३ करोड बराबरको लगानी प्रतिबद्धता प्राप्त भएको छ भने साधारण स्वीकृति प्रक्रियाबाट १८१ परियोजनाका लागि १८ अर्ब ६४ करोड बराबरको प्रतिबद्धता गरिएको छ। यी परियोजनाले ९,२०६ नयाँ रोजगारी सिर्जना गर्ने प्रस्ताव गरेका छन्। यो लगानी प्रतिबद्धता ६ विभिन्न क्षेत्रहरू उत्पादन, कृषि तथा वन, पर्यटन, सेवा, पूर्वाधार र सूचना तथा सञ्चार प्रविधिमा गरिएको विभागको प्रतिवेदनमा उल्लेख छ।
वैदेशिक लगानी प्रतिबद्धता प्रतिवेदनअनुसार समीक्षा अवधिमा पर्यटन क्षेत्रले सबैभन्दा बढी परियोजना र लगानी आकर्षित गरेको छ। वैदेशिक लगानी प्रतिबद्धता प्राप्त ३१९ परियोजनामध्ये १४५ (अर्थात् ४५ प्रतिशत) परियोजना पर्यटन क्षेत्रमा रहेका छन्। लगानी प्रतिबद्धता रकमका हिसाबले १२ करोड ७६ करोड (कुल प्रतिबद्धताको ६२ प्रतिशत) पर्यटन क्षेत्रतर्फ निर्देशित भएको छ।
परियोजना संख्याका आधारमा, सूचना तथा सञ्चार प्रविधि क्षेत्र दोस्रो स्थानमा भए पनि यसले मात्र ६७८.७१ मिलियन बराबरको लगानी प्रतिबद्धता आकर्षित गरेको छ। यद्यपि, कुल प्रतिबद्धताको करिब एक तिहाइ मात्र वास्तविक लगानीको रूपमा आउने गरेको छ। नेपाल राष्ट्र बैंकका अनुसार आर्थिक वर्ष २०७१/७२ देखि २०८०/८१ सम्म नेपालले कुल ३९५.९२ अर्ब रूपैयाँ बराबरको लगानी प्रतिबद्धता प्राप्त गरेको थियो, जसमध्ये १२६.२९ अर्ब रूपैयाँ मात्र वास्तविक लगानीमा परिणत भएको थियो।
