काठमाडौं । नेपाल विद्युत् प्राधिकरणले भारतबाट मागेजति बिजुली नपाए लोडसेडिङ हुने जनाइरहेका बेला पिकआवरबाहेकको बिजुली पाउने भएको छ।
यसअघि दैनिक १२ घन्टा बिजुली आयात गर्दै आएको प्राधिकरणले आजदेखि १५ घन्टासम्म आयात गर्न पाउने भएको हो।
भारतबाट बिहान ६ देखि साँझ ५ बजेसम्म निरन्तर बिजुली आइरहेको प्राधिकरणका प्रवक्ता राजाभाइ शिल्पकारले जनाए।
भारतले पुरानै सहमतिअनुसार अब निरन्तर ६०० मेगावाट विद्युत् दिने प्रवक्ता शिल्पकारले जनाए।
‘पहिला नै हामीले ६०० मेगावाट रातीका लागि मागेका थियौं। सुरुमा भारतले १५ घन्टासम्म दिइए पनि बीचमा अत्यधिक लोड बढ्यो। नेपालले रातीमा मागेको बिजुली दिउँसो पाइरहेको थियो। बेलुकाको पिकआवरमा अझै पनि पाइरहेका छैनौं। बिहान ६ देखि ५ बेलुका समस्या थिएन। रातीको समयमा पनि विस्तार पाउँछौं,’ प्रवक्ता शिल्पकारले भने।
अहिले सुक्खा मौसममा नदीनालाको बहाव कम हुँदा जलाशय र सौर्य ऊर्जासहित आन्तरिक उत्पादन औषत १ हजार १७५ मेगावाट रहेको छ।
