काठमाडौं । विश्व फुटबलको सर्वोच्च निकाय फिफाले आगामी विश्वकपका लागि पहेंलो कार्डसम्बन्धी नियम परिवर्तन गर्न लागेकाे छ ।
बीबीसी स्पोर्ट्सका अनुसार फिफाले ‘यलो कार्ड एम्नेस्टी’ (माफी) को दायरा विस्तार गर्दै समूह चरणपछि मात्रै होइन, क्वार्टरफाइनलपछिका खेलहरूमा पनि पहेंलो कार्डको संख्या रिसेट गर्ने प्रस्ताव अघि सारेको हो ।
आगामी विश्वकप ३२ टोलीबाट बढाएर ४८ टोलीको हुने भएकाले खेल संख्या पनि बढ्नेछ । यस्तो अवस्थामा धेरै खेलाडीहरू महत्वपूर्ण चरणमा निलम्बनमा पर्ने सम्भावना बढ्ने भएकाले फिफाले नयाँ व्यवस्था ल्याउन लागेको हो ।
यस विषय क्यानडाको भ्यानकुभरमा मंगलबार बस्ने फिफा काउन्सिल बैठकमा छलफलका लागि एजेन्डामा राखिएको छ ।
