काठमाडौं । अमेरिका, क्यानडा र मेक्सिकोमा यस वर्ष हुने फिफा विश्वकपको २३औँ संस्करणको निम्ति फ्रान्सले राष्ट्रिय टोली घोषणा गरेको छ ।
शुक्रबार फ्रान्सका मुख्य प्रशिक्षक डिडिअर देशच्याम्पसले विश्वकपको निम्ति २६ सदस्य राष्ट्रिय टोली घोषणा गरेका हुन् । फ्रान्स फुटबल संघले आजै खेलाडीहरूको नामवाली समेत सार्वजनिक गरेको छ ।
फ्रान्स यस संस्करणमा समूह ‘आई’मा परेको छ । फ्रान्सको यो विश्वकपमा १७औँ सहभागिता हो । फ्रान्सले १६ पटक विश्वकप खेल्दा दुईपटक विश्वकपको उपाधि उचालेको छ ।
फ्रान्सले सन् १९९८ मा घरमै आयोजित विश्वकपको १६औँ संस्करण र सन् २०१८ मा रुसमा सम्पन्न २१औँ संस्करण जितेको हो । टोलीले प्रतियोगितामा दुईपटक उपविजेता बन्दा दुईपटक कास्य पदक जितेको छ ।
टोलीले दुई संस्करण क्वार्टर फाइनलसम्म खेलेको छ । फ्रान्सले एकपटक अन्तिम–१६ खेलेको छ भने एक संस्करण चौथो स्थान हासिल गरेको छ । विश्वकपको इतिहासमा फ्रान्सले ६ पटक समूह चरणसम्मको यात्रा तय गरेको छ ।
यस संस्करण टोलीले पहिलो खेलमा सेनेगलसँग जुन १७ मा खेल्ने तालिका छ । यसपछि, फ्रान्सले दोस्रो र तेस्रो खेलमा क्रमशः जुन २३ मा इराक र जुन २७ मा नर्वेसँग खेल्ने तालिका छ ।
फ्रान्सको राष्ट्रिय टोली : माइक मेइगन, ब्राइस साम्बा, रोबिन रिसेर, लुकास डिग्नी, मालो गुस्तो, लुकाज हेर्नान्डेज, थिइओ हर्नान्डेज, इब्राहिम कोनाटे, जुलेस कौन्डे, विलियन सालिवा, डायट उपामेकानो, मेक्सेन्स लाक्रोइक्स, एन’ गोलो कान्ते, मानु कोने, एड्रियन राबिओट, औरेलिन चुआमेनी, वारेन जाइरे इमेरी, माघ्नेज एक्लौची, ब्राड्ली बार्काेला, रायन चेर्की, ओसमान डेम्बेले, डिजायर डुअे, जेन फिलिप माटेटा, केलियन एम्बाप्पे, माइकल ओलीज र मार्कज थुरम ।
