कपिलवस्तु । सीमावर्ती क्षेत्रबाट भारतबाट अवैध रूपमा भन्सार छली नेपालतर्फ ल्याउँदै गरिएका कपिलवस्तु जिल्लाको विजयनगर गांउपालिका वडा नं १ नयांगाउको जंगलबाट ८० वटा खसीबोका सशस्त्र प्रहरीले बरामद गरेको छ।
सशस्त्र प्रहरी बल नेपाल बोर्डर आउट पोस्ट (बिओपी) जवाबैराठको गस्ती टोलीले सीमा नाकामा जाँच तथा अनुगमन गर्ने क्रममा अवैध रूपमा नेपाल भित्र्याइँदै गरिएका खसीबोका नियन्त्रणमा लिएको हो।
सशस्त्र प्रहरी नायब उपरीक्षक यज्ञमान साउदका अनुसार चोरीपैठारीकर्ताहरूले सीमा क्षेत्रका गैरकानुनी मार्ग प्रयोग गरी भन्सार छलेर खसीबोका ल्याउँदै गर्दा सुरक्षाकर्मीको टोलीलाई देखेपछि चौपाया छाडेर फरार भएका थिए। बरामद गरिएका खसीबोकालाई आवश्यक कानुनी कारबाही तथा लिलामी प्रक्रियाका लागि भन्सार कार्यालय कृष्णानगर मा बुझाउने तयारी भइरहेको सशस्त्र प्रहरीले जनाएको छ। सीमा क्षेत्रमा हुने अवैध चोरीपैठारी तथा तस्करी नियन्त्रणका लागि सशस्त्र प्रहरीले गस्ती र निगरानीलाई तीव्र बनाएको छ।
अवैध तरिकाले खसी, बाख्रा नेपाल भित्र्याउन बालबालिका प्रयाेग हुने गरेकाे छ ।उक्त क्षेत्र बाट लामो समयदेखि खसिबोका, कुखुरा, कुखुराका चल्ला लगायत अन्य सामानको तस्करी भए पनि सुरक्षाकर्मी हरूले पटक पटक अबैध सामान समातेका छन्। तर पनि तस्कर हरूको मनोबल उच्च नै रहेको प्रष्ट देखन सकिन्छ।
नेपाल सरकारकाे नियम अनुसार पशु क्वारेन्टाइनकाे विना चेक चाँच कुनै पनि पशुु चाैपाया अन्य मूलकबाट आफ्नाे मूलकमा ल्याउन पाइदैन् । तर विना चेक जाँच र विना भन्सारकाे खसि बोका पटक पटक भित्रनु आफैमा गम्भीर प्रश्न खड़ा गरेको छ।
