ठमाडौं । संयुक्त राज्य अमेरिकाको भ्रमणमा रहेका प्रधानसेनापति प्रभुराम शर्माले आज बिहीबार पेन्टागनमा रक्षा मन्त्रालय तथा अमेरिकी सेनाका उच्च अधिकारीसँग भेटवार्ता गर्ने भएका छन् । अमेरिकास्थित नेपाली दूतावासले शर्माको भ्रमणबारे प्रेस विज्ञप्ति जारी गर्दै यस्तो जानकारी दिएको हो ।
दूतावासका अनुसार प्रधानसेनापति शर्माले यो भेटमा नेपाली र अमेरिकी सेनाबीचको सैन्य सहकार्य र सहयोग तथा सम्बन्ध विस्तारका विषयमा छलफल गर्नेछन् । बिहीबार नै उनी न्युयोर्क प्रस्थान गर्नेछन् । त्यहाँ उनले संयुक्त राष्ट्रसंघका अधिकारीसँग भेटवार्ता गर्ने कार्यक्रम रहेको विज्ञप्तिमा उल्लेख छ ।
संयुक्त राष्ट्र संघको आह्वानमा शान्ति स्थापनार्थ लेबनान र सिरियामा खटिएको नेपाली फौजको अवस्था र वस्तुस्थितिको अध्ययन तथा निर्देशनपछि प्रधानसेनापति प्रभुराम शर्माले १३ असारदेखि संयुक्त राज्य अमेरिकाको भ्रमण थालेका थिए ।
