मेरो काममा अवरोध गर्ने कसैलाई पनि बाँकी राख्दिन
जनार्दन शर्मा गृहमन्त्री ‘मेरो काममा दवाव आयो भने मैले जानेको छु’
शेर बहादुर देउवाको नेतृत्वले तिनवटै तहको निर्वाचन गर्न सक्छ ?
यस्तो कुनै प्रश्न नगर्दा हुन्छ । दोस्रो चरणको निर्वाचन उत्साहपूर्वक सम्पन्न भएको छ । बाँकी निर्वाचनहरू सम्पन्न हुने कुरामा दुईमत छैन । चुनाव गराउन बिल्कुल सम्भव छ, प्रधानमन्त्री देउवासँग टिम छ, टिमको सहयोगबाट उहाँले चुनाव गराउन अवश्य सक्नुहुन्छ । आगामी मंसिरभित्र सबै निकायको निर्वाचन गर्ने तयारीमा सरकार अग्रसर भएर लागिरहेको कुरा तपाईको सञ्चारमाध्यममार्फत जानकारी गराउन चाहन्छु ।
संविधान कार्यान्वयनको लागि लागि परेको भन्नु हुन्छ तर मधेशवादी दलहरूलाई सँगै निर्वाचनमा लिएर जानसक्नु भएन नि ?
तपाईले मधेसवादी दलहरू भनेर भन्नुभएको राजपालाई होला ! तपाईले देख्नुभएकै छ राजपा पनि निर्वाचनको मैदानमा छ । राजपाका कैयौ नेताहरू स्थानीय तहको चुनावमा स्वतन्त्र उम्मेदवारका रूपमा प्रतिस्पर्धा उत्रिनुभएको छ । त्यसैले स्थानीय तहको चुनावमा राजपाको सहभागिता छैन भन्न मिल्दैन । राजपाका नेताहरूकै इच्छा बमोजिम सरकारले तेस्रो चरणको निर्वाचनको मिति सार्वजनिक गरेको हो । तेस्रो चरणको पनि सार्वजनिक भइसकेको छ। यसमा पनि उहाँहरूको सहमतिबाटै समझदारी भएको हो ।
त्यसो भए अब संविधान संशोधन हुन्छ ?
मैले भन्दाखेरी संशोधन नै हुन्छ भन्नु ठीक नहोला, संशोधनका लागि हाम्रो तर्पmबाट प्रयत्न अवश्य हुन्छ । प्रतिपक्षलाई पनि मनाउनुपर्ने अवस्था छ । हामी प्रयास गर्छौं । सरकार निरन्तर प्रयत्नशील छ ।
पहिलो र दोस्रो चरणको निर्वाचनमा केही फरक पाउनुभयो ?
सुरक्षाका दृष्टिकोणले अवश्य फरक भयो । पहिलो निर्वाचनबाट केही सिक्दै फरक स्थितिमा निर्वाचन गर्नुपर्ने भएका कारण अवश्य फरक रह्यो भन्न सकिन्छ । हामीले सुरक्षा व्यवस्था पनि फरक तरिकाले व्यवस्थित गरेका छौं । पहिलो चरणको निर्वाचन र दोस्रो चरणको निर्वाचनमा सुरक्षा व्यवस्था पनि फरक छ ।
नेपाली सेनाको स्थान कस्तो रह्यो ?
सरकारले दिएको जिम्मेवारीअनुसार नेपाली सेना बाहिरी घेरामा रहेर निर्वाचनलाई शान्तिपूर्ण रूपमा सम्पन्न गराउने काममा खटेको हो । सेनाको स्थान महत्वपूर्ण सुरक्षा शक्तिको रूपमा रहेको छ ।
नेपाल प्रहरीलाई परिस्कृत गर्नेभन्दै केही महत्वकांक्षी योजना अघि सार्नु भएको छ, अब कस्तो बन्छ प्रहरी प्रशासन ?
नेपाल प्रहरीभित्र सिपाही, हवल्दार र तल्लो स्तरका अफिसरहरूलाई कार्यबोझ भएको र त्यसमा पनि सेवासुविधा कम भएको स्थिति छ । उनीहरूको मनोबल कसरी बढाउन सकिन्छ भन्नेमा हामी गम्भीर छौँ । सिपाहीहरूमा आएको निराशालाई उत्साहमा परिणत गर्नका लागि प्रयास गर्दैछु । सेवा सुविधा र उत्साहका साथ प्रहरी निकायलाई जनताको भलाइमा समर्पित गर्न जागरुक गराउने र उपल्लो निकायमा भएको गुटगत क्रियाकलापलाई निरुत्साहित पार्ने योजनामा म क्रियाशील छु । प्रहरीमा राजनीतिकरण भएको देखेको छु, त्यसको अन्त्य गर्ने, अपराधलाई अन्त्य गर्ने र जनताको सुरक्षा दिने वातावरण मिलाउनु मेरो पहिलो प्रयत्न हुनेछ । यस्ता प्रयत्नहरू कत्तिको सफल हुन्छन् त्यो फरक पाटो हो, जहाँसम्म मेरो कार्यकालको सवाल छ, म इमान्दार भएर काम गर्नेछु ।
प्रहरीको सरुवा बढुवामा मनोमानी हुँदैन त अब ?
नेपाली जनताका कोही छोरा छन्, कोही छोरी छन्, कोही काका छन्, कोही भतिजा होलान् । त्यसको आधारमा केही दवाव आउलान् । तर त्यसको कानुनी उपचार हुने तरिकाले म अघि बढ्ने छु । विधिवत व्यवस्था कानुन हो, कानुन बनाइयो भने नेपाल प्रहरीमा मात्र होइन कुनै पनि ठाउँमा सोर्सफोर्स लाग्दैन । अन्याय परें भन्ने कसैलाई लाग्यो भने कानुनी उपचार खोज्न पाउने बाटो खुला रहने छ । अब प्रहरी प्रशासनमा हुकुमवाद चल्न पाउने छैन । गृह प्रशासनको गरिमा पनि अवश्य स्वच्छ हुनेछ ।
सबैभन्दा भ्रष्ट प्रशासन भनेको प्रहरी प्रशासन हो भन्छन्, अहिले पनि धेरै पूर्व हाकिमहरू जेलमा परेका छन् नि ?
अब यस्तो हुँदैन । पारदर्शी तरिकाले काम हुन्छ । म यसमा पूर्ण सजग छु ।
जसले गल्ती गर्छन् त्यस्ता व्यक्ति कारबाहीमा पर्छन् हैन र ?
जरुर । तर गल्ती नै गर्दैनन् भने किन कारबाही गर्नु ? मलाई विश्वास छ अब प्रहरीबाट त्यो खालको गल्ती हुन पाउने छैन ।
सशस्त्र प्रहरी र गुप्तचर निकायलाई प्रभावकारी बनाउने योजना अघि सार्नु भएको छ नि ?
हो, मैले थालेको छु । सम्भव देखेरै थालेको छु । सुधार नगरेर राज्यले सकारात्मक बाटो लिदैन । सुधार गरेरै अघि जाने हो । सबै सुरक्षा निकायलाई सुधार गर्न जरुरी छ ।
जनार्दन शर्मा मुलुकको काम गर्ने व्यक्ति हो, कुनै पनि दवावमा नपरी काम गर्न सक्छ भन्ने जनतालाई विश्वास दिलाउन तपाई सक्नुहुन्छ ?
म त्यही प्रयत्नमा छु, म कसैको दवावमा परेर काम गर्दिन । आफ्नो मुलुकको शान्ति, स्थायित्व र विकासको काममा लागेको व्यक्तिलाई जनताले विश्वास गर्नु स्वाभाविक हुन्छ । प्रधानमन्त्रीले पनि त्यस्तो व्यक्तिलाई सहयोग गर्न सजिलो हुन्छ । प्रधानमन्त्रीलाई सफल बनाउनको लागि र जनतालाई केही राहत उपलब्ध गराउन कटिबद्ध भएर लाग्ने हो भने देशमा परिवर्तन भएको महसुस जनताले गर्नेछन् । म एक सिपाई हुँ । मैले मुलुकको भलाइको लागि ड्युटी गरिरहेको छु । सबैले सहयोग गर्नुहुनेछ । कतैबाट मेरो काममा बाधा अवरोध गरेको खण्डमा म त्यसको उपचार मैले खोज्नैपर्छ । जनताले सही र गलत छुट्याउन सक्छन् ।
सुधारका कार्यक्रम लागु गर्न कति समय लाग्छ ?
मसँग त्यस्तो कुनै जादुको छडि छैन् । धेरै सुधार गर्नुछ । महत्वपूर्ण सुधारका योजना अहिले अघि सारेको छु । गृह मन्त्रालय र विज्ञहरूसँग छलफल गरेर सुधारका काम ल्याएको छु । म मात्रैले गर्ने होईन यसमा सबैको साथ सहयोग र हौसलाको खाँचो छ । मुख्यतः जनताको साथ चाहिन्छ । धेरै काम छन् । केही ऐनहरू पनि संशोधन गर्नु आवश्यक छ ।
–प्रस्तुति ऋषि धमला
-जनधारणा साप्ताहिक